الكـــورة

      ياللي عشقـتم لعـب الكـورة      خلـوا شويّة  عـقـل أمـال

زيطه ودوشة لشوطة عظـيمة     لو دخـلت جـول فيها إشكـال

فـين الروح الحلوة قـولولي      فـين العـقل وطـول الـبـال

جـوه التليفـزيـون وإذاعـة      و نـاس مشدودة ووقفة حال

واللي يسيـب الدرس ويجري      أحسـن يفوته الماتش يا خـال

واللي يسـافـر آخـر الدنـيا      يحـضـر ماتشنا ف السنغـال

واللي يكـون خايف م الدوري     وإن فـات يبقي ف دور إسهال

بين فريقـين والكـورة بتجري     وحكم يجـري يمـين وشـمال

وإن غـلبونا يـبقي يا ويلهم      نـنـزل نضـربهم  في الحـال

إزاي يخـدوا الكـاس ويفوزوا    وإحـنا فريقـنا رجـال أبطـال

آدي قضـيـة لعـب الكـورة     مش أخلاقـنا - لأ -ده محـال

مـاتش الكـورة فيه الغـالب      والمغـلـوب والحرب سجـال

لما نشجـع نـادي نصـونه       والكـلـمة الحلـوة بتتـقـال

بالأخـلاق الحلـوة ح نـبقي      منـتـصـرين وف كل مجـال

      والأعـلام ح تـرفـرف بيننا      فـرحة  عظيمة وعـال العـال