ملحوظة : هذه هي الحلقة الثانية من حلقات ادارة التنوع .. يرجى الرجوع للحلقة الاولى بتاريخ21 نوفمبر2011ولقاء مع د. عصام خليفة المتخصص باتنمية البشرية والتدريب..
ايه التنوع وميزاته .. وازاي تتم ادارة التنوع بطريقة تحقق مصالحنا كلنا؟؟
ودي بالتفصيل مجموعة حلقات عن الموضوع اسمحوا لي تنزل كاملة كما هي بأسئلتي واجابات ضيفي واسئلة المستمعين ... في تجربة يارب نستفيد منها كلنا .. لو ما عندكش وقت تسمع راديو ممكن تقراه ...
الحلقة الثانية
مسألة مهمة جدا ان احنا نعرف ازاى ندير التنوع و أعتقد اننا ممكن نستفيد بمسألة ادارة التنوع جوة بيوتنا جوة مؤسساتنا فى أشغالنا لو سافرنا برة موقفنا كمصريين لما بنشتغل فى شركات multinational مليانة جنسيات كتيرة هنستفيد من ادارة التنوع كمان فى بلدنا ازاى نعرف نحدد هدف مشترك طول الوقت مايخلصش و ماينتهيش و لما هدف يتحقق ده معناه ان فى هدف تانى لازم نسعى اليه لايجاده و تحقيقيه لان موصلناش لكمال مفيش دولة بتوصل لكمال فاكيد بتدور طول الوقت على هدف مشترك
فاصل موسيقى
د / نادية النشار:
دكتور عصام طبعا احنا نتمنى نوصل لحالة مثلى من ادارة التنوع, على فكرة انا بس عايزة اقول معلومة صغيرة جدا ادارة التنوع ده المفروض كنا نناقشه من ۳ أسابيع و من أسبوعين لكن أجلناه عشان ميتأخدش بمحمل واحد فقط هو المحمل الدينى, لانه من الخطورة اننا نعتقد ان التنوع الوحيد فى مصر هو التنوع الدينى فعشان كدة خوفنا جدا فقولنا نحطها فى وقت اكثر حياداً لكن بالمصادفة الموجز يحمل خبر أول مناقشة مشروع مرسوم بقانون حول تنظيم و بناء دور العبادة يبدو أنها مسألة متجددة و مستمرة اننا نتكلم فيها و يبدو ان فى الحاح على ان ده التنوع الاصلى عندنا التنوع الدينى هو التنوع الاصلى احنا عايزين نأكد يا دكتور انه فى تنوعات أخرى و كلها يستفاد بها اتفضل
د / عصام خليفة:
هو فى تنوعات اخرى و كلها يستفاد بها و لكن التنوع الدينى هو اكتر تنوع ممكن يضر اذا اسئ استخدامه. الشعب المصرى هو شعب متدين بطبعه و دى طبيعة معظم الشعوب الشرقية و كلمة عقيدة حتى بتاتى من عقد النية أو العقدة التى تدخل فى النفس البشرية أو الارتباط القوى بهذه الفكرة حتى تصل الى عقيدة ، الفكرة دي قوية جدا فهى عقيدة فالدخول من خلال العقائد و حتى الموروثات و حتى العادات و التقاليد مش بس العقائد بيبقى سهل جدا لصناعة الاخر اللى احنا بنتكلم عليه فبيبقى مطلوب من اللي يدير أو الحاكم فطنة عالية جدا فى ادارة هذا التنوع لانه لازم يبقى في علم ادارة التنوع اللي بيبدأ من وضع هدف مشترك و لازم يبقى في هدف مشترك أقوى بين اى نوع من انواع التنوع لو احنا مش عايزين نسجن نفسنا فى هذا الموضوع و الحاجة التانية انك لازم تدرك ان الشخص التانى دة مش هو الاخر و الحاجة التالتة انك لازم ترفع الاحساس بالظلم و الحاجة الرابعة انك انت لازم تذيب الافتراض لان من اكتر الاشياء التى تصنع الاخر هى الافتراض أنا ممكن أقعد أفترض أنك أنت أخر و أنت مش أخر و دة حصل و دى مفاجأة احنا اكتشفنها فى ميدان التحرير ان كل اللى كان بيبص على التانى على أنه أخر الليبرالى كان بيبص على الاخوانى أنه أخر لما قعدوا مع بعض في الميدان اكتشفوا انه مش أخر أنه مهموم بنفس القضية و فى أشياء مشتركة و المسلم والمسيحي و كل الاتجاهات.
د / نادية النشار:
بس هنا يا دكتور عايزة أقول حاجة انه ان لم يكن للدولة أو لادارة الدولة دور فى محو فكرة ان الاخر عدو كنا احنا من نفسنا تجمعنا على قلب رجل واحد.؟؟؟
د / عصام خليفة:
هى كان لها دور اننا ثورنا كان لها دور قوى جدا انها قعدت تخنقنا لحد لما قمنا بثورة كلنا.
د / نادية النشار:
بس فى الآخر احنا اللي قررنا نمحى فكرة الآخر... أنا بعد الفاصل دة هأطرح سؤال و أرجو اننا كلنا نشترك فى أجابته احنا دلوقتى بتلقى بكل العبء على ادارة الدولة ان هى تستفيد بالتنوع وان هى تخلق حالة جديدة من الوئام بين التنوعات المختلفة أو على الاقل لا يتدخل البعض فى افساد العلاقات بين المتنوعين تمام.
فاصل موسيقى
د / نادية النشار:
يعنى دكتور فى كذا comments من اصدقائنا بدأت تشير لكذا جانب من جوانب التنوع و الاستفادة من التنوع لكن حابة قبل الـ comments أرجع تانى للنقطة اللي أثارناها قبل الفاصل أحنا لما حضرتك أشارت الى ميدان التحرير و تجاهلنا كل اختلافاتنا و بقنا واحد و كان دورنا احنا.. كناس كشعب كمواطنين... دلوقتى ادارة التنوع كلها ملقاة على دولة و على ادارة دولة و على ادارة مؤسسات من يفشل فى ادارة التنوع داخل أسرته داخل مؤسسته داخل شركته هو المسئول بالتأكيد هو المسئول الاول لكن لا نعفى أنفسننا من المسئولية دكتور عصام ايه دور الدولة و ايه دور الفرد .؟؟؟
د / عصام خليفة:
دور الفرد طبعا فى معتقداته و مفاهيمه أنه يطور مفاهيمه و ينمى مفاهيمه ان يصل دائما للحقيقة دور الفرد أن يفصل بين تحركاته و انفعالاته يعنى ممكن أوى اقفز عشان هدف كرة قدم لكن مينفعش اضرب زميلى عشان هدف كرة قدم ممكن اوى اعرض قضيتى من غير ما احتك بالاخر احتكاك عنيف لازم نفرق بين مفاهيمنا و انفعالاتنا جزء كبير من انفعالاتنا أو جزء كبير من مفاهيمنا بتخضع للانفعالات جزء كبير من حركاتنا بتخضع للانفعالات يبقى دور الفرد ان هو ينمى مفهومه و يطور مفهومه و اننا نكون دائما فى حالة استقبال للاراء الاخرى و دائما فى حالة مراجعة للرأى يعنى دة التربية الحقيقية للفرد و دة للاسف اللي احنا بنفتقر اليه انا نفسي اشوف مرة مناظرة بين اتنين واحد اقتنع برأى التانى مبتحصلش لان كل واحد عنده رأى راسخ عايز يفرضه على الاخر لكن معندوش فكرة ان هو يستمع للاخر و يعيد تفكيره هذا هو دور الفرد أعادة التفكير الخروج عن دائرة الانفعالات ، دور الحكومات بقى كبير جدا و اكبر من دور الفرد . للاسف..
د / نادية النشار:
ليه للاسف؟
د / عصام خليفة:
لان هنا بيبقى الرهان على كفاءات الحكومات أو على كفاءة الافراد فالافراد دول لو معندهمش الكفاءة الكافية بتبقى في مشكلة كبيرة جدا الافراد بيتحركوا تحرك جماعى فى حالتين حالة ما اذا كان هناك قيادة أو حكومة أو ادارة أو حالة ما اذا كان هناك احتياج حقيقي للتغيير أو ثورة فاحنا لما اتحركنا فى ٢٥يناير كانت ثورة التحرك القادم مش هيعتمد على ثورة,,, التحرك القادم هيعتمد على ادارة و نظام و قيادة فهنا دور الحكومة مش هنقول بس تنمية المفاهيم هنتكلم بقى اللي بتعمله المؤسسات ...المؤسسات بتعمل ايه فى ادارة التنوع ..؟ أول حاجة لازم يكون في قواعد ثابتة لازم نرفع الاحساس بالظلم لازم المفاهيم عننا تبقى واضحة ، ادارة التنوع داخل المؤسسات اعتقد وضع الهدف المشترك من الاشياء المهمة جدا اللي بتحتاج تحطها المؤسسة و بتحتاج تحطها القيادات ان هما يحطوا هدف مشترك ، وضع ملامح للتعامل و طريقة للتعامل ، مبدأ أحقاق الحق ، مبدأ تذويب فكرة الآخر عن طريق الخطاب الاعلامى أو ان احنا نحط قوانين دايما تذيب فكرة الاخر ميبقاش فى آخر فكل الحاجات دي كلها أنا باعتقد انها من وظائف النظام أو وظائف الادارة أو القيادة.
د / نادية النشار:
يعنى القاء العبء كله مرة تانية على القيادة لكن اعتقد انه مسئوليتنا احنا ... كمان فاطمه صالح على الفيس بوك بتشير لنقطة مهمة جدا ان التنوع مطلوب و بيظهر ايجابيات لكن برضو التنوع في ناس محددة هى اللي تقدر تفهم فكرة التنوع و فى ناس تانية بتمشى وراء القائد اللي يقودها فى اتجاه اخر..... يبقى هنا بنرجع تانى العبء على ادارة الدولة ثم على من يعرف يقوم بدور اجتماعى يعنى قصدى اقول انه بدل ما نلقى اللوم طول الوقت على ادارة الدولة التى تعيش مرحلة انتقالية يبدو انها تطول فتيجوا نشتغل احنا كافراد نقوم بدور.
د / عصام خليفة:
ما هو حتى الحتة اللي انت بتقوليها دى هى حتة القيادة.. احنا بنتكلم في القيادة.. ما هوصاحب الدور الاجتماعى دة هيبقى قائد، مفهوم القيادة لا تعنى دايما رئيس الدولة او رئيس الوزراء او حتى رئيس المجلس العسكرى ، مفهوم القيادة بتعنى الشخص اللى لو طفل بيلعب مع مجموعة أطفال وقام بتوجيهم ده قيادة ، حضرتك خليتى الموضوع يمتد للقيادات الاجتماعية و القيادات الثقافية موافقين بس من يمتلك السلطة الحقيقية دائماعادة بتكون القيادات السياسية لانها بيكون في ايدها سلطات لكن الانواع الاخرى من القيادات برضو بتمتلك انواع اخرى من السلطات ما هو انت من خلال برنامجك الاعلامى بتمتلكى سلطة التأثير فى الاخرين أو سلطة المورال العاطفة ان الناس لو حبت فكرة هى دى سلطة ، لكن السلطة المكتبية اللي هى السلطة المباشرة او المؤسسة اللي عندها Authorities lofficia فدى بيقع عليها القدر الاكبر من المسئولية لكن مش كل المسئولية يعنى خلينا واضحين لكن مش كل المسئولية.... ممكن يكون قدر أكبر طبعا من المسئولية مفيش كلام .
د / نادية النشار:
فاصل و هنطرح الموضوع المهم التانى اللي احنا نوهنا عنه في البداية لما احنا بقى بنتكلم عن ادارة التنوع فى الداخل هنتكلم عن لما احنا بنبقى برة ازاى احنا ندار فى ادارات تنوع ناجحة.
فاصل موسيقى
د / نادية النشار:
دكتور فى أسئلة كتير مطروحة على صفحاتنا على الفيس بوك كمان هنفتح الـ sms بالرسائل فى تليفونات الموضوع المطروح بعد ما نتلقى التليفون هيكون ليه بننجح لما بيديرنا من يستطيع ادارة التنوع بشكل ناجح فى شركات عالمية او فى مؤسسات دولية او لما بنسافر برة ناخد أحمد على التليفون
مكالمة أحمد :
د / نادية النشار: صباح الخير عليك يا أحمد بارحب بيك .
أحمد : ألو صباح الخير دكتورة نادية.
د / نادية النشار: صباح النور.
أحمد: باصبح على دكتور عصام .
د / عصام: صباح الفل.
أحمد: أحنا مستمتعين يا دكتورة نادية .
د / نادية: ربنا يكرمك يا أحمد أنت منورينا و الطرف الثالث هو الاهم ان كلنا بنتفاعل مع بعض و الحقيقة فى أسئلة مهمة جدا بتوصلنا على الصفحات و بتثرى الحوار اتفضل يا أحمد.
أحمد: دكتور عصام بأحيي حضرتك هل االافضل فى التنوع تغيير الافكار فى نفس الاشخاص لضمان الاستقرار أم تغيير الاشخاص و الاعتماد على نفس الافكار لضمان النجاح و يمكن يعنى هندخل فى نقطة تانية كرويا دكتور عصام لو حضرتك تسمح لى بنقول مثلا الاهلى و تزلزل مستواه حاليا صدمة للجماهير هل لانه يتم الاعتماد على افكار قديمة ومع دخول لاعبين جدد مفتقدين الانسجام عندما حاول المدرب تغيير الخطة لم يرتقى مستواه للافضل و قيس على كدة الشركات و المؤسسات فما هو الافضل فى الارتقاء بالمستوى تثبيت الافكار و تنوع الاشخاص أم تنوع الاشخاص و تثبيت الافكار أم تغيير الاثنين معا و شكرا لحضرتك.
د / عصام خليفة:
أنا بأحييك على سؤالك العبقرى اسمح لي انى انا اتواصل مع المشاهد بتاعك بشكل مباشر يا دكتورة.
د / نادية النشار:
دة أنا فرحانة جدا جدا بالسؤال الخطير دة بص تغيير الافكار و تغيير الاشخاص.
د / عصام خليفة:
احييكى على مستمعيكي .
د / نادية النشار:
هو دة مستوى مستمعى مصر يعنى هو دة مستوى الجمهور المصرى.
د / عصام خليفة:
سؤال جميل جدا و انا هاختصره هاحسمه فى جملة هو تغيير الاتنين و فاكرة احنا اتكلمنا فى حلقة من فترة عن موضوع مانويل جوزيه و النادى الاهلى و التغيير مطلوب و لا الاستعانة بالخبرات احنا كلنا اميل الى فكرة التغيير لان التغيير حتمى حتى لو كان الشخص الموجود كويس يعنى فى دايما حتمية للتغيير فهو الاجابة ببساطة شديدة هو تغيير الافراد و تغيير الافكار و التغيير لازم يبقى دورى الــ
حتمية لان الافراد لو فضلوا مش هتبقى مسألة ثقة بس يا أحمد يعنى مش بس هنفقد الثقة Organizational ngehac
دة هو كل شخص بيبقى له capacity او له قدرة معينة ان هو ممكن بعد الفترة دى يفقد حماسه حتى لو هو شخص كفاءة qualified هو نفسه يفقد قدراته و يفقد ابداعاته لو متنقلش لمكان اخر فانا مع تغيير الافراد و تغيير الافكار مع نفس الافراد مع تغيير بعض الافكار يعنى هنكون دايما مع فكرة التغيير لان التغيير هو ديناميكية الكون و يمكن كلمة انا دايما بارددها مفهوم الاستقرار Dynamicمفهوم الاستقرار فى الحركة و ليس فى الثبات..
د / نادية النشار:
انت بتنافسنى يا أحمد فاصل و هنرجع بقى لموضوعنا الاصلى المطروح باشكرك يا أحمد جدا على السؤال الجميل و على فكرة برضو ينافس احمد مستمعين كتير على صفحتنا على الفيس بوك بأسئلة على الفيس بوك هنطرحها حالا.
فاصل موسيقى
د / نادية النشار:
يعنى يمكن برضو فاطمه صالح بتشارك بمجموعة أسئلة قبل لما نروح للخارج بتقول طيب ازاى ندير التنوع فى الداخل عشان احصل على أعلى النتائج. احنا قولنا اننا بعد الفاصل هنقول ان ليه احنا بننجح فى دول تدير تنوعاتها او فى مؤسسات نصطدم يعنى ساعات واحد يسافر و يرجع مش قادر يتكيف مع المجموعة أصل المصرى دة غير الهندى دة غير بتوع كل دول شرق أسيا غير الافريقى أحنا بالتأكيد نتمنى أن نكون متميزين فى الاتجاه الايجابى لكن هل نبدأ بالتدريب على ادارة التنوع من الداخل عشان ننجح فى المؤسسات العالمية أو فى دول الخارج و لا بننجح ليه و احنا مش ناجحين هنا بننجح ليه برة و احنا مش ناجحين هنا
د / عصام خليفة:
هى فكرة الادارة و القيادة لان لما بنروح برة الادارة بتتغير و القيادة بتتغير نفس الافراد و السؤال التقليدى ليه الشاب المصرى بيغسل صحون برة و مبيغسلهاش فى مصر و الله الشاب زي ما هو متغيرش اللي اتغير المجتمع يبقى العيب مش فى الشاب العيب فى المجتمع او فى ادارة المجتمع و الشاب دة احنا اللي مادنهوش الفرصة انه يغسل صحون داخل مصر لكن هنرجع تانى لفكرة ادارة التنوع دايما لو احنا فى مؤسسة لو انا مثلا بأدير مؤسسة او بأدير دولة ادارة التنوع دائما بتبدأ ان أنا بافكر فى ايه الاشياء المشتركة بين البشر اللي ممكن اشتغل عليها نرى جزء كتير منها سيكولوجى و جزء كبير منه تواصل ان أنت ازاى تتواصل مع الاخر يعنى كل البشر بترفض الظلم يبقى لازم فى فى ادارتى للتنوع مبدأ ثابت و بنسميه rule أو مبادئ أساسية أن احنا نكون مرتبطين جدا بالنظام العادل فى ادق الاشياء و يبدا ارتباطنا بالنظام العادل دة نوضحه فى كل خطوة بنأخدها يبقى بدأ كل أخر يرتبط بمبدأ انسانى و هو العدل مبدأ لا يختلف عليه اخر و لا تختلف عليه اي ايديولوجية و لا تختلف عليه اي جنسية هافكر في حاجة تانية ادارة التنوع تجاه الهدف المشترك يعنى مثلا هدف المؤسسة انها تبيع السنة دى بكذا و بالتالى كل شخص هيزيد مرتبه بنسبة كذا فبدأ كل شخص مهما كان اخر يتجه لهدف يمتصه و يستهلك طاقته و يوجه طاقته في هذا الهدف فادارة التنوع تبدأ بأخذ الاشياء المشتركة بين البشر و العمل على هذه الاشياء المشتركة او على هذه النقاط النفسية و تبدأ بوضع هدف مشترك يتحرك الكل فى اتجاه هذا الهدف المشترك و طبعا بقى صناعة الاختلاف من خلال التنوع بتبقى بنفس الطريق البحث عن الاشياء المختلفة و نقاط الاختلاف بين البشر و احنا ممكن نتكلم فيهم بشكل اكثر استطراداً.
