" هابقى بيئة "
نفسى مرة أبقى بيئة
أبقى م الناس الخنيقة
اللى بتمثل علينا
قال و لابسالنا القناع
نفسى أخون و أكدب و أغش
يبقى ليا ألف وش
أرمى من قلبى الصراحة
و أبقى عايش بالخداع
نفسى أنافق نفسى أطاطى
نفسى أعلِّى أى واطى
لاجل ما يوصلنى فوق
ينتشلنى م الضياع
نفسى أكون غدار و قاسى
نفسى أخلى الناس تقاسى
و اللى مرة هيشترينى
مش هاقوله غير وداع
نفسى أعيش ف الدنيا قوة
ليا هيبة كـ الفتوة
و إن ف مرة نهبوا حقى
ما يجيبوش إلا الدراع
أصلنا ف دنيا عجيبة
و العقول فيها غريبة
تشترى فيها الأصيل
تلقى إنه ندل باع
يا للا يا ولاد الأصول
بينا ثورة ع الفلول
بس دول مش ف السياسة
دول فلولهم ف الطباع
