محمد عبد اللطيف " هيكل عظمه نصحني : "

##################
نصّ عامّيه \ منولوجست \ ساخر :
هيكل عظمه نصحني :
##################
دايماً دايماً \ حمّر عينك \ لمّا يجيلك \ حد يقولّك \ هات قرشين
حمّر عينك \ قولّه منين \ أيّوا منين ؟
وقولّهُ خزاين البنك ف حجري
وعشان مانا سبته بقيت تِسابقني
وامّا بتوصل آخر السِكه
بتلاقي كُفوفهم بِتسَقْفلي .
ودايماً دايماً \ حمّر عينك \ لمّا يجيلك \حد يقولّك \ هات خوختين
حمّر عينك \ قولّه منين \ أيّوا منين ؟
وقولّهُ الشجره بتاعتي لوحدي
وقولّهُ بتاعتك لمّا بتسقي
لكِن قبل ما تقطف منها
‘‘‘‘‘‘ لابُدّ تقطفني ‘‘‘‘‘‘‘‘‘‘ !
ودايماً دايماً \ حمّر عينك \لمّا يجيلك \ حد يقولّك \ هات رغيفين
حمّر عينك \ قولّه منين \ أيّوا منين ؟
وقولّّّه بتزرع قمح ب إيدك
وبتعجن قوتي بدم وريدك
لكن نار الفرن ف يدي .
ودايماً دايماً \ حمّر عينك \ لمّا يجيلك \ حد يقولّك \ هات بيضتين
حمّر عينك \ قولّهُ منين \ أيوا منين ؟
وقولّه الفرخه بتهتف ضدي
إطلع إطلع برّه حظيرتي
وبتنقرلي \ وبتزغرلي
لكِن ضدك بيضها هتفلي !
ودايماً .. دايماً \ حمّر عينك \ لمّا يجيلك \ حد يقولّك \ هات أوضتين
حمّر عينك \ قولّه منين \ أيّوا منين ؟
وقولّه قواعد البيت دي بِنايتك
وحُمّرة طُوبُوا بتشبه دمّك
لكن رملة مونتُوا عجينتي !
ولمّا يجيلك \ حد يقولّك \ مين فكرلك \ مين دبرلك ؟
قولّهُ دا هيكل عظمه نصحني
‘‘‘‘‘‘‘‘‘‘‘‘‘‘ أفدي الكبش ! ‘‘‘‘‘‘‘‘‘‘‘‘‘
‘‘‘‘‘‘‘‘‘‘‘‘‘‘ وأدبح إبني ! ‘‘‘‘‘‘‘‘‘‘‘‘‘
###############################