محمد أبو الفتوح " دفيان ف عز البرد .. إلى أم مصطفى "

دفيان ف عز البرد .. إلى أم مصطفى
--------------------------------------------
القلب نام دفيان ف عز البرد

لمَّا عيونِك طبطبوا بشوقهم عليه

صَبَح الشتا ف لحظه أوان الورد

لو شافُه مرَّه ربيع يغير منه ..

يشاكل فيه

نايم بلا غطيان ف ليل طوبه

شايفك صبيَّه منوَّره ..

ما بين الجِفن و الننى

أناجيكى

لحد الفجر ما يأدِّن

و اغيب عنِّى

و اكون فيكى

و اتوه منى

ألاقيكى

و أنسى عينيَّه و نَظَرهم

فاشوف الدنيا بعينيكى

أنا المشغول بدنتيلا

تزين طرف ديل توبك

و انا الدايب مع الحِنَّه

و سارح ويَّا موج شَعْرِك

و انا المخلوط بملح الرَّقوه و مخزَّق

عيون حُسَّادِك الحمرا

أنا الجَمْرَه

تشعلل ف العدو نارها

و تيجى لحد باب قلبك

و تتفجَّر ألوف فراشات

فتملى سماكى بالألوان

إن كنتى إنتى الدفا ..

و كنت انا إنتى

منين انام بردان ؟!
___________________
محمد أبو الفتوح
صفحتى الرسمية: https://www.facebook.com/aboelfotoh1