صرخة من وجداني  وجداني  حسين لا تنساني تنساني

يا شفيع ذنوبنه بيوم الحساب  رايدك وكت اليهلون التراب

**

حالة الموت وتفاصيلة مصيبة   وليلة الوحشة على ابن ادم رهيبة

ما يفيد الون ولا ينفع نحيبة     قلبي يبقى ينادي ابو اليمة اريدة

تظل عليك عيوني  عيوني   ما تخيب ظنوني ظنوني

ياللي نورك ما يمنعة اكبر حجاب   رايدك وكت اليهلون التراب

**

عكب موتي بقبري لمن يكعدوني  ومن يوجهولي سؤال وينشدوني

بعمرك شسويت اكتب يأمروني  انا ما عندي فقط دمعة عيوني

هاي دمعة عيني يا عيني  جانت على حسيني على حسيني

وادري دمعي عليك يمنع كل عذاب   رايدك وكت اليهلون التراب

**

ادري ما احزن ولا احتار بامري  شلون اهم وحسين هوه هناك ذخري

يكفي نيشان اللطم هذا على صدري  اثر انفاس المجالس يضوي قبري

انا بسمك صوتي يظل صوتي  ببرزخي وبموتي وبموتي

وانتظر يحسين تنعم بالجواب   رايدك وكت اليهلون التراب

**

والجوارح كلها خالتشهد علية  اجدامي ماتعبت ولا تعبت ادية

للخدامة نذرت روحي وكلشي بيه  والفكر مشغول بالراحت سبية

صرختي يازينب يا زينب  والدليل معذب معذب

جنت قلبج صاح من بعد الغياب   رايدك وكت اليهلون التراب

**

ما يفارقني امل بسمك يرجواي  انتظر لحظة لقائك تحضر بهاي

تصيح هذا خادمي وحسابة وياي  جان يحضر مجلسي ويوزع الماي

روحي اسمك بيها  اسمك بيها  اول وتاليها وتاليها

وهاي حسن الخاتمة وحسن المآب   رايدك وكت اليهلون التراب

**