تسعر بكلب احبابك شيطفي نار غيابك
لتخلينة يا والينة
شيطفي نار غيابك
****
يحيدر خلصت عمرك وعفت دنيا الحزن والهم
رحت متصوب براسك وخضابك يحيدر دم
بمصابك يبو السبطين ركن دين الله يتهدم
عفت فجر الكرامة عليك اظلم يا علي اظلم
يا علي بفرض ايمانك رحت بجرح عدوانك
ومخضبينه يا والينة
شيطفي نار غيابك
****
مثل جرح الذي براسك يا حيدر تركت جروح
بكل كلوب احبابك جرح يا حيدر بكل روح
تصرخ يا علي الايتام يمك والدمع مسفوح
جنت تفيض احسانك بعدك هي وين تروح
ايتامك المنتظرة ببابك تهل العبرة
انهض لينة يا والينة
شيطفي نار غيابك
****
ختمت يابالحسن عمرك بالمحراب والطبرة
تسافر لله متخضب رحت يا آية الكبرى
بحرب محد قدر يدناك الا يا علي بغدرة
وعلى باب الامل ظلت يحيدر واكفة الفقرة
احبابك تيتمها بفراقك تألمها
وتصرخ وينة يا والينة
شيطفي نار غيابك
****
امس وجهك ضوة الها وبكل عين يا حيدر
بي تنظر حنان الجان وجهك يا علي يزهر
شلون تعيش من بعدك هيه تفارقك تقدر
وانت الما عليهه يوم جنت فد مرة تتأخر
جان بعطف يرعانه وبفيضة وباحسانه
يحن علينة يا والينة
شيطفي نار غيابك
****
بقت تنحب عليك ايتام يبوهه بدمعه سجابة
الله يعين كل واحد فقد يا حيدرة احبابة
يظل يحسب ليالي فراق وشيصبرة على غيابة
واللي راح شيردة وهوة توسد ترابة
تبقى عَلَيه تتروع الغايب بعد ما يرجع
وموسدينة يا والينة
شيطفي نار غيابك
****
يا حيدر طفت عينك ورحت من عدنه يا ضرغام
حملنة جمرة فراقك يا حيدر بحزن والام
امل جان الامل انت بينه غدرت الايام
تظل عيون احبابك سهرانه وبعد متنام
وية النعش اخذوها ارواحنه شيعوها
ومشيعيهه يا والينة
شيطفي نار غيابك
****
