انه زينب ليلي ما اگدر انامه
امي ماتت واحنه ظلينه يتامه
ظلمه وحزينه الدار..واسيني ياكرار
عالزجيه
*********************
عصر گلبي الحزن بويه ونزف جرحه
واخذ من عيني أمي وغابت الفرحه
على الزهره الصبر مثلي انهدم صرحه
وعشت كل عمري ليل وما طلع صبحه
گلبي يا حيدر اذا تسمع ونينه
يعني مشتاگه لحظن امي الحنينه
عافتنه واحنه ازغار.. واسيني ياكرار
عالزجيه
*********************
مصايب دنيتي صبن عليه الهم
وبگلبي جرح يابويه ينزف دم
خلاني الدهر مفجوعه وتألم
وبزغري افارك امي وتيتم
ياعلي صوبني حال الزهره بصواب
منهه كسرو جم ظلع من دفعو الباب
وبشوغت البسمار .. واسيني يا كرار
عالزجيه
*********************
عليه الزهره جانت خيمه يالوالي
بالعشره حنينه وترئف بحالي
عافتني بونين الفاگد الغالي
وعگبهه الدار اصبح مظلم وخالي
اگصد لحجرتهه ويذكرني دمعي
جانت امي هنانه تصرخ آ يظلعي
وبروحي شبت نار .. واسيني ياكرار
عالزجيه
*********************
يحيدر واخوتي ظل يجري مدمعهم
حنان الأم عزيز وفگده لوعهم
يبجون بقهر كل ليله اسمعهم
ظلعهه وشوغت البسمار تفجعهم
فارگو امهم وأبد ما نامت العين
والحسن بجفوفه يمسح دمعة حسين
شيصبر المحتار .. واسيني ياكرار
عالزجيه
*********************
واروح لبيت الأحزان وأجر حسره
اسئل والگلب مثل الظلع كسره
يا جرح الأشد بصوابه عالزهره
محسن من وگع لو شدة العصره
امي صاحت من وگع محسن عله الگاع
رادت عيوني تشوفك والامل ظاع
يهظمني كل الصار .. واسيني يا كرار
عالزجيه
*********************
ظلمتني يحيدر دنيتي وظليت
اون لفراك امي الغاليه وحنيت
اظل ابجي عليهه ويبجي حتى البيت
اموت انه وترد أم الحسن ياريت
راحت وذكراهه كل يوم اعله بالي
وساهرت ويه الحزن سود الليالي
طبع الزمن غدار .. واسيني ياكرار
