وحدي عافوني الأهل === ياعلــــي خير العمل
ــــــــــــــــــــــــــــــــــــــــــــــــــ ـــــــــــــــــــــــــ
جــدّي ياحيدر علي
عنـّي راحوا كل هلي
والألم ما ينجلي
ما بگــه عندي أمل
ــ
ودّعوني إبوحدتي
تجري من دم عبرتي
راح أبوي إو مهجتي
گلبي بالنار إشتعل
ــــ
ودّعتني عيلتي
والعقيله وإخوتي
عمــّي يمسح دمعتي
ودّعوني بالعجـَل
ـــ
روحي ويـّاهم سرت
عيني تبراهم جرت
والرزايا إنبرت
تملي گلبي وإنشغـَل
ــ
وحدي وَيْ بيت الحزن
آني ظلــّيت إو أون
محــّد إعليــّه يــِحــِن
ريته ياخذني الأجـَل
ــ
أسأل الطير اليجي
أسمع أخبار أرتجي
والعباده منهجي
أنســَه بيها ما نـزَل
ــ
ما هـِدَه گلبي إو بـَرَد
والذهن منـّي شــَرَد
ما أشوفنهم بـَعـَد
والضــُوَه منـّي زعــَل
ــ
ظلمه ظلــّت دنيتي
وأنتظرهم سلوتي
ويــّه نوحي إو غربتي
بالبچــي صرت المثل
ـــ
جــدّي ياحامي الحِمه = صــوّب إعيوني العـِمه = دمعي أصبح من دِمه
والفرح عنــّي إرتحل
