باجر لو تشوفيني  يزينب ما تعرفيني
***
يودعها وتهل عينه   ويكلها الامر حتمي 
هسه كاعد كبالج   و باجر عالارض مرمي
لو شفتيني عالغبرة   يزينب لا تجي يمي
مطبر بالحجر راسي    وشيبي مخضب بدمي
اذا باجر تلاقيني  يزينب ما تعرفيني
***
باجر آه يا زينب   وكل الاه من باجر
وجهي هذا وجه الله  يبقى على الارض عافر
لو شفتيني بالمصرع  دلالج يظل حاير
كل اوصالي تتوزع   بين السيف والحافر
اذا مكطوعه جفيني  يزينب ما تعرفيني
***
بالميدان يا زينب  باجر ينخسف بدري
اذا ودج تقبليني  هسه قبلي نحري
انشدج يختي حاجيني  سؤال براوح بفكري
شتسوين اذا شفتي  الشمر قاعد على صدري
تجين ومن تنظريني يزينب ما تعرفيني
***
باجر لو وكع جسمي  والاسياف وذرنه
راسي على الرمح يبقى اظن عندج خبر عنه
اذا يم الجسد جيتي  تاخذ قلبج الونه
شلون تعرفي اوصافي  والطعنه على الطعنه
اذا جيتي تحاجيني  يزينب ما تعرفيني
***
اودعج والوعد وياج يصير بساحة المصرع
اذا رد المهر خالي  ينوح ويهمل المدمع
تعالي ولا تجيبي وياج  سكنه خوفي تتلوع
شيصبرها لو شافت  ابوها على الثرى موزع
اذا ودج تواسيني  يزينب ما تعرفيني
***