خيم الليل بظلامه   وانا ادور عاليتامه 
يلعب بسوطه على متني  خوية يا ريتك شفتني
وانا ادور عاليتامى
***
خالي مهرك من لفاني   يصهل بصوت الظليمه
بالمهر خوية تعلك  جم يتيم وجم يتيمه
جنه يبن امي يكلي  لمي ايتامه وحريمة
من بعد ساعه يزينب   للحرم ما تبقى خيمه
وانا ما ادري شدهاني  وانعكد خوية لساني 
لمن الخيل اعتنتي   خوية يا ريتك شفتني
وانا ادور عاليتامى
****
خوية نارين الولني  اطفي يا نار السرية
نار البقلبي على ضيمي  لو لهب نار آل اميه
غير الباذني اسمعه  يسب علي حامي الحمية
بصبري اتجلد واكابر  حرمه وشيوكع بدية
وانا من طيحة كفيلي   كومة ما بية على حيلي
وانت لو يمي عنتني  خوية ياريتك شفتني
وانا ادور عاليتامى
***
اطفالك العندي امانه  بهجمة الكوم افكدتهم 
خوية وخيول ال امية  بالحوافر سحكتهم

والبقوا منهم يخوية ساعة الشردوا شفتهم
سلمت شمس المناحة  واعتنيت ودورتهم
يا طفل ادنه يمه  ينادي من خوفة يعمه
وهالمصيبة شيبتني  خوية ياريتك شفتني
وانا ادور عاليتامى
****

طفلة من بين اليتامى  ضيعتني وضيعتها
شبت النار ببدنها  شاطت لحومة اعتنتها
ومن وصل ليه خبرها  انا يبن امي اتبعتها
اعثر ببين الضحايا  تبجي يم جسمك شفتها
تنادي بوية اليوم اريدك  كلي ياهو الحز وريدك
وانا طفلة ويتمتني   خوية ياريتك شفتني
وانا ادور عاليتامى
***
كومي كلتلها يعمه  عالقدر احنه شبدينه
تكلي وديني لعمه  كافل باسمه الضعينه
حتى لو مني تعذر  اخذ يساره ويمينه
بيهن نحامي خدرنه  لو عدو رايد يجينه
جفوف ابو الغيرة خيمنه  انكطعن واحنا انهظمنه 
وهاليتيمة ذكرتني  خوية ياريتك شفتني
وانا ادور عاليتامى
***
عفية حيلي وعفية صبري  

حسرة للموت بدليلي  مارحت للشاطي شفته
كل اخوتي شاهدتهم  بس كفيلي ما وصلته
ادري يعذرني واعرفه  شهم ويغار على اخته
وبوجوده خدري عالي   ومحد الشاهد خيالي 
وحكي اصيحن يالعفتني   خوية ياريتك شفتني
وانا ادور عاليتامى
****