عين زينب متنام بالغاضرية
***
عين زينب متنام والليلة عاشر
والعلم لله شلون يفجعها باجر
باجر بحيرة تطيح بين المناحر
زينب ام الاحزان والقلب شاجر
المشتكى لله يصير من هالرزية
***
المشتكى للرحمن تشكيله همها
من تشوف النيران حركت خيمها
الليلة يمها العباس وحسين يمهه
وباجر من يروحون تستذكر امها
تنادي وينج هاليوم يمة الزجية
***
الليلة ليلة وداع والدمع يحلى
زينب بعبرة ونوح تحجي وية رملة
تكلها باجر علوم قلبج تسله
وبوداع العريس حزنج يكمله
حنته من دماه ينطفي ضيه
***
وللرباب بيا حال بالله شتكلهه
باجر النبلة شلون تذبح طفلها
هالرضيع المظلوم عزها واملها
بمصرعه السبعة تنوح يفجعها كلها
هالطفل ما رحموه ظلام امية
***
لخيمة الاكبر راح يكثر بجاها
تواسي ليلى وشلون باجر عزاها
علي اشبه الناس بالهادي طه
يبني يا ماي العين يصبح نداها
صعبة وتشيب الراس هاي المنية
***
وللكفيل العباس لو سالت العين
حكها وشلون الحال كطعوله جفين
والاشد من تروح وتودع حسين
عدها يبقى يا حيل من هظمة البين
بالله يا عين تنام هاي المسية
