كمر جفك اشمه -- اندبك هايايمه
يايمه عيوني حراس -- ياعباس
**
انه ام البنين عتابي مجروح
عذبني البعد والفركه والنوح
افراكك يبو فاضل حير الروح
اجيك المصرعك والدمع مسفوح
مثل ملزهره تحضر -- للطف ويه حيدر
تحرس رفعة الراس -- ياعباس
*
كمر باقي بضمير العاشق اسنين
نذر زهرة سنينه فدوه لحسين
اشوفك اسد يرفض طبكة العين
كفيل ومن ظهر فخر الميامين
ماتغمض عيونك -- من ترحل ضعونك
حادي العتره نبراس -- ياعباس
*
مشيت انحر الصحره بلايه عنوان
وبدون ايعاز عقلي اتلكه الاحزان
شفت وسطة طفوفك مرمي قران
صريع بلايه ناصر دامي عطشان
ياوحشة صفنتي -- ياليلي وغربتي
العبره اتوصف الاحساس -- ياعباس
*
عفت شهكة اللهفه بذمة الليل
ويوديني الجدم للعلكمي ايميل
عتاب الدمعه تروي لمن اتسيل
عضيدك يمه بعدك سحكته الخيل
بمحطة ذكرياتك -- الوفه يترجم صفاتك
غيره وبيها تنقاس -- ياعباس
*
ابد ما ينذبح حلمي وحنيني
اجت تفديك يسراي ويميني
واجر سهم الغدر عذب سنيني
قبل ما طفه عينك طفه عيني
ياسلوة خواطر -- انه بليلك اناطر
سيف بوجه الارجاس -- ياعباس
*
الملم نايباتي واهجر النوم
واطشر فرح عمري بجمر الهموم
حليب امك يايمه ايحشمك اتكوم
تره زينب سبوهه عكبك الكوم
جرح رافك حياتي -- لحد ساعة مماتي
حسره ابين الانفاس -- ياعباس
*
ترد الروح مسبيه وحزينه
لحد صوب المصايب بلمدينه
ينوح الناعي ما بطل ونينه
اواسي الحره بحسين وبنبنه
ما صيحن بنيني -- اصرخ ياحسيني
عصمه وقدوه للناس -- ياعباس
*
