علي خويه يالاكبر رايده وياك -- عليله ولاصبر وأصبر على فرگاك
--
علي خويه يالاكبر خل اسولفلك -- خويه اهلي نفسهم همه هم اهلك
ايعيفوني عليله شلون مو أهلك -- وأموت بدار موحش خويه هم يرضاك
--
يرضاكم يالاكبر من اظل وحدي -- أشكبرني وهاكثر احمل هظم چبدي
ما أگدر وحگ المرتضى جدي -- يومي لاعشت خويه عگب عيناك
--
فرگاكم صعب وآنه عزيزتكم -- وتطيب خاطري لوشفت لمتكم
مهيوبه يخويه ابهاي هيبتكم -- مكسورة گلب ما اظل اترجاك
--
ابلياكم أظلن بس جسد لاروح -- وعبد الله يخويه اوياك هم ايروح
دليلي على أغيابه مو يظل بالنوح -- و جفني اعليه بعد مايغمض ابممشاك
--
اتنطر يخويه لو بعد هيهات -- تعال أسمع ونيني وأسمع الآهات
ودمع عيني چواني بيه احس جمرات -- تجافيني وأختك ماتريد أجفاك
--
دنياكم يالاكبر لارحم بيها -- لأختك فاطمه ايتيمه تخليها
متهزك لمن تسمع بواچيها -- هم ترجع بعد للدار واتلگاك