يهل شهر الفجايع بالصدر عبره
واشوف احسين جسمه اموسد الغبره
**
يشهر الموت ريض اوكف اشكيلك
اريدك لاتمس احسين ابجيلك
ينعه الكون لاجله وكلبي ينعيلك
لان هو الصراط وحبه عالفطره
*
صراط وزاحف بركب النبوه اليوم
يفك قيد البشر ويناصر المظلوم
وعله اجتاف الدهر يسعه بكلب مهموم
ولاشوفن صبر مايوصل الصبره
*
الصبر مو بس اشوفه بهيبتك يحسين
واشوفن بيك محرم منجسم نصين
ما بين النحر وبكطعة الجفين
ومابين الخيم ماتنطفي الجمره
*
الخيم شبت هضيمه ومابقت خيمه
مثل زينب غريبه وطرت الهيمه
لذلك هالعليل ايباصر الغيمه
شتجاوب بالدمه ولاتنفع المطره
*
الدمه خضابك تناثر بالسمه الزركه
وشهك خيط الفجر ماغابت الشركه
ذبل عودي بمصابك ذبلة الوركه
وتعت بيه الرياح ومالت الكتره
*
الرياح اتغربت من غيبتك تسعي
رغم كيظ العطش مابطلت تنعي
انه بدونك غريب وحاير بوضعي
واتوسد غربتك واسكن الصحره
غريب انت وعبيرك يرسم طيوفك
من اشم باب الضريح اتذكر طفوفك
احس شهرك محرم ينطر ضيوفك
ويدك باب الكلب باللوعه والحسره
