هل دمعك -- عله ابن امك -- مسموم الحسن يحسين
--
ناده الحسن خويه حسين -- جرحي بعد مايبره
نار اتلاهبت بحشاي -- وبگلبي تشب جمره
خويه السم مرد چبدي -- هذا اگبالك اتنظره
لوّن جدي وابويه اهناه -- يمي وتحظر الزهره
يواسوني -- يودعوني -- يغسلوني بدموع العين
--
يحسين اگعد اگبالي -- خويه لو تجي يمي
راسي بحظنك اتخليه -- يحسين ابمچان أمي
آخر ساعه هاي اوياك -- عنك ارحل ابعلمي
من أتديره عالقبله -- ابهيده لوردت جسمي
عمري أنباد -- يبو السجاد -- اي خويه لخيك عين
---
لاتبچي يخويه حسين -- وتطوي ضلعك اعليه
امسح دمعك امن العين -- وهوّد روعك أشويه
مو گلبي كسرته أشلون -- وازداد الالم بيّه
ابچينه اهواي عالزهره -- اعله ابونه الراح فجريه
بالمحراب -- من انصاب -- وآنه اوياك متيتمين
--
عشنه ايتام خويه حسين -- امنه ازغار عافتنه
هاي اسنين من العين -- تجري اعليها دمعتنه
ومصيبة أبونه النوب -- مرّه الغصص جرعتنه
وچفوف الغدر يحسين -- بالسم تالي جازتنه
احس بالروح -- خويه اتروح -- منين السم اجاني امنين
--
خويه الطشت من يمي -- عني رايد اتكتره
خاف اختك تجي زينب -- چبدي امگطع اتنظره
ماتحمل وهي ابياحال -- بعدها ابحزن عالزهره
مكسورة گلب يحسين -- وكسر الگلب شيجبره
صبّرها -- وأجبرها -- وگلها يختي لاتبچين
--
ابها اللحظه اجت زينب -- نظرت للحسن ممدود
راسه ابحظن أخيه حسين -- وينازع ابروحه ايجود
صاحت خويه ابو محمد -- لفتنه النايبات اردود
مثل امي وابويه اتروح -- لينه ابروحتك متعود
حسين أوحيد -- يظل اتريد -- والعدوان متشمتين
--
ريت السم مضه بيّه -- صاحت زينب او لابيك
ولاشوفن دمعته حسين -- من عينه تهل اعليك
يبن امي العضيد اعزيز -- أسمعه ابلهفته ايناديك
خويه امودع الله روح -- عيني مابعد تلگيك
الله اوياك -- ودعناك -- وأحنه بهاذي موعودين
--
