رقيه يارقيه ---- شحملتي يارقيه
---------------
رقيه شفتي ياصور -- ياموقف اللي تنسيه
زغيرونه بعدچ عالهظم -- مرً الهظم واجرعتيه
وينچ او وين النايبه -- مذبوح اخوچ اتشوفيه
عبد الله عينچ شافته -- من دم وريده امشربيه
من اخذته المنيه -- رقيه يارقيه
----------------
رقيه مكسورة گلب -- بيمن گلبها اتجبره
اشلون الها روح اتحملت -- ابلا راس ابوها اتنظره
اخوتها كل واحد بدر -- غيبوا عنها بدره
الاكبر اخوها ابمصرعه -- أ وجسام نام بكتره
اه الغاضريه -- رقيه يارقيه
----------------
هيه رقيه بياعمر -- كل العمر خمس اسنين
بالغاضريه اتروعت -- المصرع تشوفه بالعين
خيل اجت عشره وسحًگت -- كل ظلع كسرت بحسين
ومن المخيم للنهر -- شاهدت طاحن چفين
ابيا حال صارت هيه -- رقيه يا رقيه
--------------------------
بياحال عمها شافته -- عالنهر من طاح العلم
وسمعت ابوها من صرخ -- ياخويه مو حيلي انهدم
ظهري انكسر يبن الابو -- من يحمي عباس الخيم
صارت رقيه ابلا امل -- خوف وعطش رهبه والم
بعد اهل الحميه -- رقيه يارقيه
---------------------------
ظلت رقيه بالخيم -- تتراجف وبيها الهلع
هجمت الخيل ابلا رحم -- الها فلا واحد فزع
خيمتها نار اتلاهبت -- تتصارخ او محد سمع
ركظت رقيه وچم طفل -- والخيل تسحگ للوگع
متيسره ومسبيه -- رقيه يارقيه
-----------------------
مسبيه للشامت مشت -- وراس الابو وياها
من عالرمح عينه تصد -- ليها وتصد عيناها
اتگله يبويه اتيمت -- ايتيمك من يرعاها
زغيره بعدني بعازتك -- وروحي الهظم يبلاها
ياهو ايحن عليه -- رقيه يارقيه
-------------------------
ابمجلس الظالم من جمر -- عالخد تهل دمعتها
من فزت ابليل الحزن -- ياوالدي صرختها
بالطشت راسه شافته -- طاحت خفت ونتها
ميته لگتها اعله الطشت -- لمن اجت عمتها
وافتها المنيه -- رقيه يارقيه
