الورقة ماجتش معايا اللي فيها انما وزير الداخلية معانا لأن النيابة بعتت لنا التعديل
هنا أصله مكتوب 15 قتيل وفيه اتنين اتوفوا بعد ذلك وأخطرتنا النيابة بذلك
17 قتيل منهم 7 من المسلمين و9 من المسيحيين
كم العدد؟ هم زعلوا على واحد لسه آهو جاي وقتيل مجهول الشخصية
هي الفتنة الطائفية حقيقة ماكانتش نايمة هي قائمة منذ سنة 72 وعندي خطاب هنا انه أكتر من 119 من اللي شاركوا في الزاوية الحمرا من الحرامية والمجرمين اللي شاركوا في انتفاضة الحرامية وفيه اللي عنده 13 سابقة و5و7 و30 و18و33 و22و19سابقة بأسماءهم
عشان لما قلت ان 77 كانت انتفاضة حرامية البعض ماوافقش على هذا وكان بيدلل انها ارادة شعبية
زي ما سمعتوني لما رأس الكنيسة الانبا شنودة زعل وقال عاوز كتائس قلت له عاوز ايه قال عاوز اعبد ربي قلت كام قال 30/35 قلت خليهم خمسين انا اقصد رسالة في هذا الذي قلته  ان المسألة مش تحكُّم او محاولة ‘ملاء ارادة من المسلمين على المسيحين
أو أو .. وخاصة وإنه بناء الكنائس كان فيه مشاكل دائما قلت له أنا مش هااستأذن حد أقول له والنبي أدي الأبنا شنودة كام؟ لأ أنا صاحب القرار في هذه البلد
 وباديء ذي بدأ عاوز أقول لكم الاخوان المسلمين كجمعية غير موجودة رسميا وغير شرعية
لأنه بمقتضى قرار مجلس قيادة الثورة الجمعية محلولة فليست هناك جمعية وليس هناك جرنال كدعم
أنا شفت الأنبا شنودة وشوفت التلمساني وقلت له اللي انا باقوله لكم دلوقتي قلت ياتلمساني الجمعية غير شرعية بمقتضى قرار مجلس الثورة اكتبوا طلب جديد لوزارة الشؤن الاجتماعية وبالروح اللي احنا بنتعامل بيها واللي قلت بها للانيا شنودة عاوز كام كنيسة قلت له كَمِّل ..  أكتب طلب والجريدة عشان تاخد موافقة بس لادين في السياسة ولا سياسة في الدين.
 أخدوا راحتهم ووقتهم من 72 لـ 81 وبعدين فردوا عضلاتهم  ده مش من 81 بس ده انا من لما  كنت في الصعيد في جامعة المنيا وانتم سمعتم لما الاستاذ بيقول لي أمام التليفزيون: الحقنا ده وضع لايُقبَل  فانا قلت له دول ولاد ونديهم فرصة وفعلا ادينا فرصة ولكن للاسف كان بيؤخذ هذا على انه ضعف من السلطة  للأسف من الجانبين سواء من الجماعات الاسلامية والاخوان المسلمين أو من ناحية الأنبا شنودة في الكنيسة القبطية بتاعتنا .
إلى أن وصلنا الي عملية الزاوية الحمرا
 حصل ايه في الزاوية الحمرا؟
حصل اللي حكيت لكم عليه لكن اللي خلاني  قلت لكم لما ارجع من أمريكا هاكلمكم في موضوع الزاوية الحمرا لو أنها كانت في الحدود اللي تقرير النيابة قالها كانت في النيابة دي كان الأمر منتهي وخلاص وياما بتقع خلافات .
ده وزير الداخلية في عملية أحدث الزاوية الحمرا وبيعيبوا عليه بعض الأحزاب  الأقلية اللي عندنا وبيقولوا ده بيشتغل سياسة بدل ما يشتغل أمن.
ده منصبه سياسي قبل ما يكون أمني واللي يحله بالسياسة قطعا أحسن مليون مرة ما يحله بالأمن ودخول القوات.. ده احنا نشكره عليه مس نلومه ...(تصفيق)
عندك ايه يانبوي
يقول لي اتصلت بحلوان بسرعة الكلام ده الزوية الحمرا ناحية الشرابية في الشمال وحلوان ده أقصى الجنوب .
لأن الشيخ اللي هناك وصله الخبر وهم في الصلاة ان القتلى من المسلمين 400  قتلوهم الاقباط.
مسجد النور هنا في العباسية بيانات ومنشورات إمتى دي اتعملت؟
ومين اللي صرف عليها؟
ايه الشحن ده كله؟
في الوقت اللي العملية ماشية  في الشرابية حلوان بتتحرك وطالعة.
 شيخ الجامع طالع بألف وخمسماية اتصل بيه الوزير وقال له  لا400 ولا 100 ولاكلام فارغ من ده كله
في الناحية المسيحية نفس الشيء
10 كنايس اتحرقوا واتقتل 300 مسيحيين
وآدي احنا شوفنا زي ما فلت و لا 300 ولاشيء ده هم 9و وواحد مجهول الهوية ..ضحك
الدلالة من ده أيه أيه اللي خلاني آدي للموضوع أهمية هو ده بقى
طيب اذا وقع بكرة  ... وده بيقع في كل وقت بين أي أصدقاء يعني الجماعة بتوع البلكونتين دول عادية .. بيدلقوا الجردل جا على الغسيل حكاية بتجرى كل يوم وداخل العايلة الواحدة وداخل البيت الواحد  طب لو جرى والشحن ده ماشي؟
وبعدين اللي لفت نظري ايه انه تَحَفُّز في جامع النور، اته جميع الجمعيات الاسلامية فيه فرق بين الجمعيات والجماعات الجمعيات دي مسجلة ومعروفة عندنا الجماعات دي الجديدة مش الجماعات لأ جميع الجمعيات اللي هي مسجلة عندنا والمفروض ان دول ناس عقلاء إجمع في جامع   النور و .. الاسلام ... الاسلام راح ..الاسلام  انتهى ويامسلمين الجهاد.
 على بعد نص كيلو منهم الكاتدرائية .. على نفس الشارع بتاع جامع النورنفس الكلام .. المسيحية بتنتهي، والأقباط بيتربصوا بيهم المسلمين، وبيقضوا عليهم
طيب وده أمر ممكن يقع
 لو وقع ده واحنا ماشيين واذا كان في الشرابية خد الصورة دي وترك آثار لسة لازم نحلها  طيب لو جرى ده في مرحلة جاية نعمل ايه؟؟
 توصل البلد لإيه؟؟ ده اللي خلاني ندهت لكم عشان اقول لكم واحط الموضوع قدامكم ومن خلالكم للشعب كله .
 قم ت بأه زي العادة  قلت هاتوا لي  الدوسيهات كلها واللي انكتب كله وبقى لي عشر ايام باقرا واحلل.
لقيت ايه ؟؟ (الرئيس يقلب في الأوراق)
التلمساني لما جا لي كان فيه فكرة انه أدخله أدخله في مجلس الشورى
على أساس باعتبار انه لنا جزء بالتعيين فبعين أقباط وأعين كذلك التلمساني عشان الناس تتقابل وتعرف يعضها باعتبار انه مجلس    الشورى ده بيت العايلة.  
ماكنتش أعرف انه هناك للاخوان المسلمين والجماعات الاسلامية
وزي ماهوريكوا دلوقتي مافيش حاجة اسمها الاخوان والجماعات الاسلامية كله واحد (تصفيق)
 الاخوان المسلمين أتاري لها تار مع ثورة يوليو.
افهم ان شنودة يغلط عشان عايزيعمل زعيم على الأقبط زعيم سياسي وعايز يحقق أهداف خاصة عنده وشايف ان الأقباط عنده مضطهدين فعايز يعمل حاجة.
انما مابفتش فاهم بدليل اني شوفت التلمساني
شوفت التلمسانى وانا باجمع الجماعات الاسلانية  بالإسماعيلية. وقلت له مش عيب أن تكتب فى مجلة الدعوة أن أمريكا أرسلت إلى ممدوح سالم رئيس الوزراء تقول له اضرب الجماعات الإسلامية لأنهم خطر عليك؟ مش عيب أن تقول هذا الكلام يا تلمسانى؟ هل نأخذ تعليمات أو أوامر من أحد؟ وهل نقبل ذلك؟.
عندما كان لدينا 17 ألف خبير سوفيتى. وشممت رائحة محاولة لفرض السيطرة من السوفييت. أخرجتهم من مصر فى أسبوع.
تعالوا للعدد أغسطس 81 بيشتم العرب التلمساني وبيقول لهم (عقدت مصر المعاهدة وعارضناها من أول يوم وعارضتموها لأنها كانت شرا من جميع النواحي  وانتظرنا ان تفعلوا شيئا يوقف هذه المعاهدة وآثارها)
 وفي نفس العدد يكتب واحد عنده : نحن نرفض فكرة فصل الدين عن السياسة : «الإخوان المسلمون لا يطلبون الحكم لأنفسهم. فإن وجدوا من الأمة من يستعد لحمل هذا العبء وأداء هذه الأمانة والحكم بمنهاج إسلامى قرآنى فسنكون أنصاره وأعوانه. وإن لم يجدوه فالحكم من منهاجهم وسيعملون لاستخلاصه من كل حكومة لا تنفذ أوامر الله».
 اتصلنا بالاخوان قبل قيام الثورة عبد الناصر شخصيا اتصل فجبنوا وخافوا اتصلنا بسراج الدين جبن
ثورة 23 يوليو زي الثورة الفرنسية تمام بالنسبة لمصر  وزي ثورة امريكا فما نيجي بهذه البساطة يتكتب بهذه البذاءة والتهجم والاجرام ؟
دي ثورة شعب وابناءهم اتعلموا وكان محكوم عليهم وعادت الحقوق لأصحابها
مبادرة كامب ديفيد ما خرَّجتش مصر من الجهاد ده اللي بيمولوهم هم اللي بيقولوهم الكلام ده ولازم يدفعوا تمنه
ثورة يوليو انا طلعت غلطان كان لازم خليتهم في مكانهم
واحد قرار النيابة قرار القاضي بتأييد مصادرة هذا العدد هاسيبهولكم هنا عشان ماضيعش وقتكم لكن انا ماقريتش هذا الكلام الا بعد ما بدأت اشوف المشكلة الحالة كلها
قرار القاضي اللي أيد المصادرة بيقول وحيث أنه يبين مما تقدم ان مجلة الدعوة في عددها كذا قد حوى من المقالات والموضوعات ماتجاوز الحدود والنقد المباح الى التشهير بالنظام الشرعي القائم بالبلاد والنيل منه والتحريض على كراهيته والازدراء به فضلا عن الاثارة التي من شأنها الاضرار بالمصلحة العامة فضلا عن الاثارة التي من شأنها الاضرار بالوحدة الوطنية
ده النيابة قالت كده لكن ليعلم كل هؤلاء أن لنا معهم حساب
ثورة يوليو بقت ملك للشعب كله وهذا التطاول منين؟
 من الذين يدّعون أنهم حملة الاسلام وحملة مشاعل الايمان
 لن يمر ... لن يمر أبدا .
صحيح ما مسكناش كتير منهم في العملية اللي تمت لكن عندي آلاف منهم أسماؤهم موجودة ومش عاوز اضطر   في يوم إني آخذ ضد أولادي الصغيرين إجراء.
 عشان كده مسكت الرؤس لكن اولادي الصغيرين المغرر بيهم هاديهم الفرصة يمكن يعودوا لإني مش عاوز أوسع.
ـ العملية ابتدت ازاي؟
انا أعلنت اني هاكلم الشعب بعد ما ارجع من أمريكا طلع شوية صلوا في عابدين عملهم حزب الأقلية نص مليون لكن هم كانوا ماية الف وخلصت الخطبة اللي قعدوا وصلوا خمس آلاف.
 العملية كانت استعراض عضلات
قبل ما امشي كان فيه شيخ في اسكندرية قاعد صنعته الهجوم ليه؟
 لأنه بيتصلوا بيه من أحزاب المعارضة ويتهجموا ويقولوا احنا هانتهجم كمان...  مسكنا الرجل والكلام كله متسجل عليه بيتعرض لي أنا شخصيا وعايلتي وبعدين في صلاة الجمعة ده إمام وحطيب مسجد القائد ابراهيم بيقول: تسهيلات أمريكية لمصر بيقول نحن نحتمي من لص بلص آخر. ايه احنا بنقول تسهيلات عسكرية عشان أي بلد عربي أو اسلامي بيكون تحت تهديد أعطي تسهيلات لأمريكا تلحقه.
 والناس بيدونا أحدث ما في العصر من أسلحة وناس بيساعدونا اقتصاديا.
على منبر الجامع بيقول إن حفل افتتاح تفريعة قناة السويس تكلف  10 مليون جنيه كان من الممكن انه يوفر مسكن لـ400 أسرة
شيخ ازهري واخد العالمية  المفروض انه بيعرف الدين وبيدعي انه داعية اسلامي 10 مليون ماانا باقول تحقيق سياسي ليه عشان لما ييجي قدام القاضي هايقول :"ده انا علمت وممكن يكون غلط". بس قدام التحقيق السياسي تعال اللي قلته كله آهو.
بتاريخ 23 يناير /81 تحدث وقال: انه لاتوجد سيادة قانون و القانون لا يُحترَم في مصر لأن هناك اعتقالات وتعذيب للمعتقلين.
وَجَّه التحية للخوميني وشعب إيران لإذلاله لأمريكا وانتقد تصريحات رئيس الدولة لأنه أيد موقف أمريكا.
 في 30 /1 انتقد الاجتماعات والزيارات التي عقدها في اسوان أنا هناك جا لي سياسيين ودي وفرصة نتكلم فيما يخص الأمور العالمية كلها
انتقد لأنها تكلف تكاليف باهظة "واذا كان الرئيس يصيف في اسكندرية ويشتي في اسوان فهو لايعلم عن معاناة الشعب ".  كما انتقد احتفالات عيد الشرطة لما تكلفته وانها استعراض للقوة  ليعلم الشعب ماسوف يحدث له اذا تعارض مع السلطة ..كله كده؟
ـ وزير الصحة اسراف في استهلاك الدوا.
ـ علق على تسمية قرية ميت ابو الكوم بسيناء وقال ان عبد الناصر كان ممكن يسمي قرية جديدة باسم بني مر وتهكم على ذلك بقوله "عشان يبقى المر بالكوم" ...ضحك
في 6/2 مهاجمة المسؤلين لتزييف الانتخابات الطلابية الأخيرة بالجامعة
وندد برئيس الجامعة ووصفه بأنه عدو الاسلام .
"التاريخ بيعيد نفسه الخديوي اسماعيل استدان لافتتاح قناة السويس والحكومة استدانت لافتاح التعريفة وان هناك ضروريات اهم لصرف اموال الدولة؟
وعلق على قول رئيس البلاد بانه هيرهن قناة السويس وبترول البلاد وأنه يؤدي لاحتلال البلاد ويذكره بالخديوي اسماعيل  ما هي زي لاتقربوا الصلاة ما انا جيت في يوم لما قرفوني العرب قلت والله ما أذل نفسي ولا مصر لهم حتى لورهنت قناة السويس.
ده مين ده اللي باقرأه لكم ده كله من قامت قيامة الاخوان المسلمين والجماعات الاسلامية عشان القبض عليه وكأن الدينا خلاص ولازم يطلع ويروحوا له بعد ما الوزير اخطره ومنعه من الخطابة قوم يروحوا له الاولاد بتوع الجماعات الاسلامية ويقولوا له روح اخطب وما تخافش قوم يروح ويتمسك .
النهاردة الاسلام في خطر والدعاة في خطر
يقول "رحلة الرئيس لأوربا وخطابه امام البرلمان الأوربي استجداء والاسلام يمنع الاستجداء"
انطباعاته انه خلال زيارته لأسوان شاهد استراحة الجمهورية هناك ومدى فخامتها وانهم منعوه من الاقتراب منها وانها محظورة على الشعب المصري ومباحة للأجانب ورجع يهجم على الحزب الوطني وانه اساس البلاء.
كل ده بيُستغل لشحن الاولاد الغلابة اللي انا مش راضي آخد اجراء ضدهم وانا باخد الوقت ده كله عشان ولادي مش عاوزهم يقعوا في حبائل هؤلاء اللي تجردوا من كل قيم وأخلاق.
ـ هاجم مجلس الشعب ووزير الصحة ووزير التعليم مناهج التعليم غلط
ـ بيهاجم المعاهدة وان اسرائيل تعتبر محتلة. 
لأنها ستكون منزوعة السلاح وأنه من البنود السرية للمعاهدة رغم اعلان الرئيس عن عدم وجود بنود سرية لضمان موافقة الشعب عليها) الواحد يقول ايه يعني ؟أيه؟ كذب؟.. إجرام؟… سفالة؟… بذاءة؟. كل ده ميوفيش لأنه لما يقف رجل معمم ومن الأزهر الشريف علشان يقول بنود سرية وهي مش موجودة والله في دي وغيرها ما هرحمه أبدا بالقانون، وديه ايه بقي من ضمن الجماعات الإسلامية يقولوله قول ومتخفش وهنقعدك ع المنبر ولا توقفك الحكومة أهو مرمي في السجن زي الكلب ليه لإنه بيشحن بالكلام ده اولادنا
اللي بيقول مافيش حرية سافر. السويس واسوان واسكندرية ....وخطب ولم يتعرض له انسان
"وأن هناك بنود أخرى تمنع مصر بمقتضاها قيام أي تنظيمات مناهضة لاسرائيل في مصر"
وأضاف: لو كانت هناك حرية كنا قلنا للرئيس قدم استقالتك.
هجوم على الحزب الوطني ...
 حتى القضاء .. علق ساخرا على خبر ان المحكمة الدستورية ستقوم بفحص الذمة المالية لرئيس الجمهورية وأعضاء مجلس الشعب.
رئيس المحكمة فعلا راحت الاقرارت نعم شوفوا حتى البذاءة .
انتقد قرار العفو عن علي صبري وسامي شرف متسائلا هلى تتناسب التهم الموجهة لهم مع التهم الموجهة للمتهمين في الفنية العسكرية التي أعدم بعضهم بسببها ؟
وعلل ذلك بأنه موقف من الدولة من المسلمين وانه زي ما صدر عفو عن علي صبري وسامي شرف يصدر عفو عن بتوع الفنية العسكرية اللي قتلوا قتلوا خمس عاسكر .
 
 وديه ايه بقي من ضمن الجماعات الإسلامية يقولوله قول وماتخفش وهنقعدك ع المنبر ولا توقفك الحكومة أهو مرمي في السجن زي الكلب” [3].
وهاجم شيخ الجامع الأزهر وبيطالب نقابة للأئمة وبيقول لهم ان الرليس عنده 35 استراحة هم مش 35 هم ماية بس لم تبنى استراحة في عهدي
"الانتخابات الفرنسية ديستان مشي طب ليه السادات ما يمشيش"؟
علق على مانشر من رفض القضاة نظر الدعوى المرفوعة من اتنين من المعارضة ضد الرئيس لقيام سيادته بسبهما علنا في إحدى خطبه مقررا "انه لايلوم القضاء بل يلوم الدستور والقانون"
29/5/81 بيقول :"مخطط من الكنيسة لاثارة المسلمين عقب مقتل أحد المسلمين على يد مسيحي بمنطقة محرم بيه" .
بيقول: الريس بيقول ان الحزب الوطني قوي فكيف يكون والريس خايف من عشرين؟
العدد اللي اتمسك 1500 العدد ده كله لعلمكم لم يصل عدد المحرضين لعشرين والباقي اللي انا حزين عليه هماعيال المغرر بيهم واللي مسمينهم أمير الجماعة
يقول :"النيابة بتماليء رشاد عثمان"
كله ده يوم الجمعة والجمعة دي كانت يوم 12 /6 /81 بيقول : "ان مراكز القوى قد أ طلق سراحهم بينما من قبض عليهم من المسلمين ظلما  في السجون من التكفير والجهاد والفنية العسكرية كلهم في السجون وأن اجهزة الأمن لم يعد امامهم الا الشباب المسلم والعلماء المسلمين"
عشان تعرفوا ان الاخوان يقولوا التكفير والهجرة دول مش معانا ..كلهم واحد
واحداث الزاوية الحمرا قَلَبها ع الآخر وقال ان الأسلحة سحبت من المسلمين وحدهم وتركت في يد المسلمين
علق على مانشر في جريدة مايو حول ما يجري عن ايران وانه بعيد عن الاسلام  وقال وهل مايحدث في مصر من الاسلام ؟ وهل الأمن الغذائي من الاسلام ؟ طبعا طبعا  عشان أاكل ناسي ده الدين والسياسة وكل شيء ده الحاكم اللي  .... ولا نعمل زي ايران الخوميني استلمها بتصدر ستة ونص مليون برميل يوميا ودخلها مائتين وخمسين مليون دولار يوميا ما هو حال ايران النهاردة بيشتروا بترول بالبطاقات ومافيش أكل
والخطير سمعتم عن صفقة السلاح بين اسرائيل وايران ، وتِلْت الأكل في ايران من اسرائيل عشان الخوميني قطع علاقته بينا عشان موقفنا من شاه ايران لو كان الخوميني بدأ يبني لكان النهاردة أغنى دولة.
ـ في الجامع بتاعه بيستورد الناس اللي من عينته علشان يهاجموا النظام
واحد من الجماعة القياديين بتوع الجماعة الاسلامية 17/6 هاجم الحكام لأنهم أضاعوا القدس وأن الصليبية واليهودية ظنوا ان أمة محمد قد ماتت لكن الله قد بعث للأمة من يجدد حياتها ونادى بضرورة التمسك  بالجهاد.
واحد من جماعة الاخوان : "كانت هناك أمنية أن تجتمع كلمة
الجمعيات الاسلامية في مصر وبوادر ذلك تتحقق في هذا الاجتماع وأن قضية القدس ليست قضية أرض وانما قضية دين وعقيدة وان السبيل لاستعادة مكانة المسلمين  هو تطبيق شرع الله و الجهاد"
 أما الجدع بتاع السويس فده انسان مجنون للأسف ولايدعو الأمر ان احنا نقول عنه حاجة.
أنا طولت عليكم وقلت الكلام ده كله ليه
لأنه القبض على هذا الامام فجر الموضوع
ده مش بس المحلاوي بتاع اسكندرية ده كمان بتاع جامع السلام
ده مش الاخوان المسلمين والجماعات الاسلامية ده كله واحد
وهاسيب لكم هنا كل الندوات اللي في قبلي كله اسيوط والمنيا واسوان وكله كلام واحد
اللي بيمتاز به امام مسجد السلام انه بيجيب الناس الحاقدين ... منهم نائب رئيس حزب العمل الاشتراكي  .. منهم نائب كان معاكم ومنهم ناتب انتم عارفينه من اسكندرية، منهم عضو من مجلس الأمة قاعد معانا وبيشترك في هذه الحملة وكان أكرم له انه يبتعد بنفسه عن هذه البذاءات وهو الذي أكرمته الدولة لكن المسألة أزمة أخلاق .. رئيس الحزب الوطني القديم .. "فتحي رضوان"
 ـ 69   سنة نقول عليه رجل فاضل
 ـ69 سنة وهو معلق قناع واحنا نقول: رجل فاضل
ـ يوم ما ساب مصر الفتاة ظلمنا أحمد حسين وقلنا فتحي رضوان احسن من احمد حسين.
 قالوا في جامع السلام في موكب النفاق لأن كل دول موكب المنافقين (لَئِن لَمْ يَنْتَهِ المُنافقونَ والذينَ في قلوبِهم مرضٌ والمُرجِفُونَ في المديتةِ لنُغرِيَنَّكَ بِهِمْ وَلايُجَاوِرُنَك فيها إلا قليلا ... )  
وده اللي هاعمله .
لن يجاورنا هنا احنا كشعب منافق
.. تصفيق حاد
ياخسارة بعد 69 سنة ده راح يخطب في جامع البذاءات وقال ان السادات قال لي تعال دافع عني في قضية أمين عثمان وانا رفضت ..
أنا ما قلت لهوش
ده سبب اني طَوِّلتْ
طيب ايه حكاية الفتنة الطائفية ..احنا كل يوم ندخل في مرحلة ونوقف؟
المرة دي لازم نحل حل جذري لأن ماعندناش وقت
أنا ملاحظ ان لازم نسمي الاشياء بأسماءها
الكلام الهجوم على  ثورة يوليو اوالكلام انها انقلاب أمر مش بس لن نتسامح فيه بل أستأذنكم في اتخاذ اجراء ثوري فيه ..تصفيق
سألوني بتوع الأحزاب اللي واردين جايين ليه مع الجماعات الاسلامية؟! وطبعا جريوا على الوكالات الأجنبية وقالوا لهم العملية تصفية المعارضة طيب ده الألف وخمسماية فيهم مائتين وخمسين مجرمين ومافيش من المعارضة الا تلاتين.
نائب رئيس حزب هنا اسمه العمل موجودة بذاءاته مسجل ليه كل كلامه في الجامع
كل من دخل من الاحزاب  من حزب التجمع او العمل كان له دور في الاثارة الطائفية
واقرا لكم عملية بسيطة جدا..
بيسأله بيقول له قفلتم الشعب ليه ؟
طبعا الكلام اللي طلع في وكالات الأنباء انها بتنغص الحياة في مصر والحزب الحاكم  وانها الدنيا مقلوبة وهي دي الديموقراطية والحرية .
حاولا يتصلوا بالتيار الديني
 ليه؟
 لأن الجماعات الاسلامية واضح تماما انها تغلغلت بشويش وواخدة وضع خصوصا في الجامعة ومع الطلبة، والباقي ده كله اللي فوق حزب العمل على التجمع الشيوعيين على بقايا الرجعيين  كل دول مافيش حاجة.
 قاموا جريوا عليهم فرفضوا في الأول ماهم اللي واخدين السبق هايخدوا حد ليه ؟
لكن عشان الجماعات الاسلامية كمان تمشي ما بقاش الكبار هم اللي يروحوا .. لا .. يبعتوا حد .
الاخوان منهم خمسة وقَّعوا على مايسمى "تحالف القوى الوطنية" ماجاش التلمساني
لازالوا بيحاولوا يستغلوا التيار الديني يركبوا به الموجة لأنه ده اللي ماشي.
نيجي لحزب العمل...
تبنت الجريدة خلال النصف الثاني من عام  79 حملة ضد التعديلات التي أجريت على قانون الأحوال الشخصية بدعوى تعارضها مع الشريعة  
الجرنال نشر مقالات لمعارضة دعوة القيادة السياسية لعدم اقحام الدين في السياسة بدعوى ان الاسلام سياسة ودين .
دي الشعب ... بيسألوني اتقفلت ليه؟       
 ـ28/2/79 عارضت توجية أئمة المساجد بالبعد عن تناول تصرفات الدولة بالنقد والاقتصار على العبادات والأخلاقيات
ـ دأبت الجريدة على نشر تصريحات لنائب معكم هنا بيزايد على الشريعة الاسلامية حول نشاط لجنة مجلس الشعب المكلفة بتقنين الشريعة واسناد مسؤلية تأخير تطبيق الشريعة  لاهمال المسؤلين بمجلس الشعب  بالاضافة الى عدم تحمس الدولة لانجاز ذلك.
 لما يكتب  لما يكتب في جريدة الشعب ان الدولة غير متحمسة لتطبيق الشريعة ده مش تشجيع للجماعات الدينية؟
ـ من خلال محاولات حزب العمل لمخاطبة القوى الدينية لمحاولة ايجاد  وضع ديني له يحعله يحظى بشعبية
ـ متحمسين أكثر من الجماعات الاسلامية.
وعينوا واحد إخوان مفرج عنه رئيس الشؤن الدينية
وصاحبنا أكد أن الاسلام دين ودولة ،وانتقد الاعلام الذي ينتقد ايران. يعني حكم ايران.. الانتقام اسلام ..خراب البلد اسلام .. القتل اسلام..   والحقد اسلام .. ويقول : "والذي جعل المواطن الايراني يتمسك بالاسلام كدين ودولة"!  بدليل ان الحزب بتاع الخوميني يتنسف هو ورئيسه هم دول اللي عايز حزب العمل نبقى زيهم
بيتكلموا عن الشعب بتاريخ 2/6/81 واثناء الندوة الاسبوعية للحزب تحدث أحد أعضاء حزب العمل ده من الممسوكين دلوقتي ان الجماعات الاسلامية يسودها حالة من الاستياء من اعلان اسرائيل بضم القدس كعاصمة بديلة وكعادة الحزب بتنفيذ خططه  على محورين دعائي وسياسي تقرر إصدار جريدة اسلامية على غرار جريدة اللواء التي يصدرها الحزب الوطني وتتضمن معالجة القضايا القومية معالجة اسلامية وكذا رؤية الاسلام في الأوضاع السياسية القائمة.
ـ في 18/6/81 عقد الحزب مؤتمرا دعا العناصر المناهضة ومن بينها التيار الديني وأفسح المجال لعضو المجلس ليقول إنه يحمي الشريعة الاسلامية في مجلس الشعب وان تقديمه لاستقالته التي عدل عنها يرجع للحزب الوطني والصغط عليه .
ـ في الزاوية لحمرا 18/6/81
دعا المؤتمر الموسع الذي دعا اليه الحزب لاتخاذ موقف موحد تجاه اعتداء اسرائيل على العراق جعل المسؤلين في الحزب الوطني لصرف الأانظار عنه فكانت أحداث الزاوية الحمرا ولصفها في المعارضة .
ـ احنا ما ألصقناهاش بالمعارضة
ـ مؤتمر الحزب يقرر ان أحداث الزاوية الحمراء من صنع الحزب الوطني
طيب لما المسيحيين ياخدوا الكلام ده
 ـ14 /7/81 رئيس الحزب صرح ان الزاوية الحمرا تقع على عاتق الحزب الوطني
طيب ليه ضرب الوحدة الوطنية في البلد ؟ "احداث الفتنة الطائفية ترجع الى محاولة إسكات المعارضة"
العمل يقول اسكات المعارضة وحزب التجمع يقول  الامبريالية والاستعمار هم اللي دفعوا الحزب الوطني لاحداث الزاوية الحمرا
ماهو لازم مادام حزب التجمع يبقى فيها امبريالية واستعمار
حكاية القبض على الامام البذيء أقيم مؤتمر شعبي يوم 21 /7أكد رئيس الحزب ان مايدور في مصر يشير الى محاسبة كل من يتحدث على المنابر فقد ألقي القبض على امام وهذا يشير الى ......
وبيروحوا محل ما بيروحوا وما حدش اتعرض لهم ولاحد راح قال لهم وطفا لهم الندوة ولاحاجة.
طيب الجريدة بتحرض على الفتنة الطائفية ولا بتحرض على ايه؟
ولا أسيبها؟
 المرة دي أبدا
كل من مهد أو ساعد أو حبذ من أحزاب، من مشتغلين بالحياة السياسية، من صحفيين، من أساتذة جماعات لن أرحمهم ..
أبدا الدور ده أبدا ....  تصفيق
حزب التجمع عمل حاجة كويسة جدا.. اشمعنا حزب العمل
راح منقي واحد شيخ وسماه لجنة الشؤن الدينية ...
واحتفلوا بليلة القدر ،والمولد النبوي ،وليلة الاسراء والمعراج ،والغزوات الاسلامية كمان  ... حزب التجمع ... الملحدين
أول اجتماع لأمانة الحزب التقدمي حكموا ان الحزب الوطني غير متواجد جماهيريا مع إن انا وجهت الشكر للقيادات اللي حلت الوضع
"بيانات وزير الداخلية غلط كلها"
الحكاية بتاعت الزاوية الحمرالا .  ده المناخ السائد بتاع الاقتصاد الطفيلي يشجع السلب والنهب ويفرغ القضية الوطنية من كل مضامينها الوطنية والتحررية والاجتماعية ويدعو للقيم الهابطة والرخيصة حيث تقتل هذه الأوضاع روح الانتماء الوطني الـ  ألـ الفلسفي الفشكوني ال ،، اي كلام ...  أي كلام ضحك  
25/6/81 اسناد مسؤلية ماحدث في الزاوية الحمرا للحزب الوطني طيب هي دي الحزبية السليمة؟
هي دي مصلحة مصر
فرضنا ان الحزب ده كان كبير واخوانا الأقباط قالوا ماهو حزب سمعوه ؟
بسم الله.. منذ فترة ليست بالقصيرة حاولت بعض الفئات المخربة في مراحل متعددة إحداث فتنة طائفية بين أبناء الأمة وعملت جاهدة للقضاء علي وحدتها الوطنية، مستعملة في سبيل تحقيق أغراضها بعض الشعارات المضللة والوسائل غير المشروعة نفسية ومادية لتعويق مسيرة الشعب في طريق تنميته وازدهاره وديمقراطيته، وقد تصدت الحكومة لهذا كله بالإجراءات العادية تارة والنصيحة مرة أخري، وبالتوجيه والإرشاد مرات..
وفي الآونة الأخيرة بصفة خاصة وقعت أحداث جسيمة هددت الوحدة الوطنية والسلام الاجتماعي، إلا أن هذه الفتنة الباغية قد استرسلت في غيها واستهانت بكل القيم والقوانين، وتنكبت عن الطريق السوي وسلكت سبيل العنف والإرهاب وسفك الدماء وتهديد الآمنين، كما أن بعض الأفراد قد استغلوا هذه الأحداث وعملوا علي تصعيدها، الأمر الذي يجب معه اتخاذ إجراءات سريعة وفورية لمواجهة هذا الخطر الذي هدد الوحدة الوطنية وسلامة الوطن، انطلاقاً من مسؤوليتنا الدستورية المستمدة من أحكام المادة ٧٣ من الدستور، وإعلاناً للصلاحيات المخولة لنا بمقتضي المادة ٧٤ من الدستور، والتي تنص علي أن لرئيس الجمهورية إذا قام خطر يهدد الوحدة الوطنية أو سلامة الوطن أو يعوق مؤسسات الدولة عن أداء دورها الدستوري أن يتخذ الإجراءات السريعة لمواجهة هذا الخطر، ويوجه بياناً إلي الشعب ويجري الاستفتاء علي ما اتخذه من إجراءات خلال ستين يوماً من اتخاذها.
.. قررنا:
أولاً: حظر استغلال الدين لتحقيق أهداف سياسية أو حزبية، وحظر استغلال دور العبادة لهذا الغرض أو في المساس بالوحدة الوطنية أو السلام الاجتماعي، أو سلامة الوطن، فلا سياسة في الدين ولا دين في السياسة.
ثانياً: التحفظ علي بعض الأشخاص الذين توافرت قبلهم دلائل جدية علي أنهم قد ارتكبوا أو شاركوا أو جندوا أو استغلوا علي أية صورة كانت الأحداث التي هددت الوحدة الوطنية أو السلام الاجتماعي أو سلامة الوطن.. أسماء هؤلاء.. ده القرار الثاني.. أسماء هؤلاء الأشخاص مطبوعة في القرار والقرار جاهز في الصحف الآن وسيوزع عليهم.
ثالثاً: التحفظ علي أموال بعض الهيئات والمنظمات والجماعات والجمعيات التي مارست نشاطاً أو أعمالاً هددت الوحدة الوطنية أو السلام الاجتماعي أو سلامة الوطن.. ووقعت قرار رئيس الجمهورية رقم ٤٧١٥ لسنة ٨١ في شأنها، وهي أيضاً جاهزة ستوزع عليكم وعلي الصحف.
رابعاً: حل بعض الجمعيات المشهرة، وفقاً لأحكام القانون رقم ٢٢ لسنة ١٤ في شأن الجمعيات والمؤسسات الخاصة والتي مارست نشاطاً هدد الوحدة الوطنية أو السلام الاجتماعي أو سلامة الوطن، وصدر قرار رقم ٤٩٢ لسنة ٨١.
خامساً: إلغاء التراخيص الممنوحة بإصدار بعض الصحف والمطبوعات مع التحفظ علي أموالها ومقارها.
سادساً: نقل بعض أعضاء هيئة التدريس والجامعات والمعاهد العليا الذين قامت دلائل جدية علي أنهم مارسوا نشاطاً له تأثير ضار في تكوين الرأي العام، أو تربية الشباب أو هدد الوحدة الوطنية أو السلام الاجتماعي أو سلامة الوطن، نقلهم إلي الوظائف التي يحددها وزير الدولة للتعليم والبحث العلمي بالاتفاق مع الوزراء المختصين.
سابعاً: نقل بعض الصحفيين وغيرهم من العاملين في المؤسسات الصحفية القومية وبعض العاملين في اتحاد الإذاعة والتليفزيون والمجلس الأعلي للثقافة الذين قامت دلائل جدية علي أنهم مارسوا نشاطاً له تأثير ضار في تكوين الرأي العام أو هدد الوحدة الوطنية أو السلام الاجتماعي أو سلامة الوطن، نقلهم إلي هيئة الاستعلامات أو غيرها من الجهات الحكومية التي يحددها رئيس مجلس الوزراء.
ثامناً: إلغاء قرار رئيس الجمهورية رقم ٢٧٨٢ لسنة ٧١ بتعيين الأنبا شنودة بابا الإسكندرية وبطريرك الكرازة المرقسية، وتشكيل لجنة للقيام بالمهام الباباوية من خمسة من الأساقفة وهم:
١- الأنبا مكسيموس أسقف القليوبية، وهو عالم قبطي سبق أن ترشح للكرسي البابوي.
٢- الأنبا صموئيل أسقف الخدمات العامة وكنائس المهجر، وكان مرشحاً سابقاً للبطريركية.
٣- الأنبا غرغريوس أسقف البحث العلمي والدراسات القبطية العليا ومدير المعهد العالي للدراسات القبطية.
٤- الأنبا اثناسيوس أسقف بني سويف والبهنسة وهو يشغل حالياً منصب وكيل الهيئة العليا للأوقاف القبطية وسكرتير سابق للمجمع المقدس.
٥- الأنبا يوأنس أسقف الغربية وسكرتير حالي للمجمع المقدس.
 
(رَبَّنَا
لاتُزِغْ قُلُوبَنَا بَعْدُ إِذْ هَدَيتَنَا وَهَبْ لَنَا مِن لَدُنكَ رَحْمَةً إِنَّكَ أَنتَ الوَّهَاب   )