ماتخفش لو نمت ونسيت
باب وحدتك مفتوح
مابقاش متاح
صاحب قديم
يملك جسارة يزقه
ويشقر عليك
ومفيش حرامي الحظ ..
ممكن ينصفه
لو خد قرار
يسرقها منك
ماتلومش غنوة قديمة ..
فقدت سحرها
كانت زمان
بتهز بير حزنك
وينفجر العياط
الغنوة هي الغنوة
والحزن اختلف
الحب حتى ماعدش
بيهز القلوب
الموت كمان
بقى مبتذل
فان يوم صادفت ف زحمة الموال ..
يا ليل
قول من زمان
وانا باسهره
وان قال يا عين
شاور على دموع العيال
واهرب بودنك.. للصمم
ما تلومش حد
نساك في زحمة يومه
واتحول شبح
الناس خطوط إبهام
محال
راح تتفق
وجعك ماعدش بينسجم
مع أي حد
حلمك تجاوز حتى
توصيفه انه حلم
إصرارك ان الأوضة دي .. بالذات
مايدخلهاش غريب
إصرار كريم
رفض انه يكسر عين ضيوفه
بمنظر الأحلام.. جثث
ماتلومش غيرك في الحياه
أنت الوحيد اللي ابتديت
تنحت ف سكة بتنتهي
لأكبر فراغ
شحات نزيه
تحدف ف أذكار الصباح على حجر ناس
من غير ما تستنى الجنيه
ويدوس عليك القطر
ف نهاية المطاف
عادي ابن عادي
ساحة النقاش