حد يقدر... الشاعر مصطفى جوهر
حد يقدر يبقى وردة؟
ساردة قِصِّتها جناين
وسط دخان المداين
زَيّ عصفورة وجناحها
مرَّة طاوية.. مرَّة فاردة
فارضة ع الأحزان عينيها
ترتجل ضحكة ماليها:
فرحة: مَرْسَى للسفاين!
حد يقدر يبقى
تفسير حلم صحرا:
إن خيل بتغنِّي خُضرة
عاملة فوق النخل حَضْرَة
تطوي ليل ؛ وتشد بُكرَة؛
تصهل المواويل معاها؛
تفرك الرملة شقاها؛
حد يقدر يبقى مطرة؟
حد يقدر يبقى
وسط الصمت هُوْجَة؟
يبقى مَدّ فـ وقت حُوْجَة؟
لما شط الناس بيبعد
وامَّا حر الشوق بيبرَد
تلتفت؛ تلاقيها جَايَة
في العباية الزرقا آية
حد يقدر يبقى مُوْجَة؟
حد يقدر
يبقى كون؟
خيط ملوِّن ألف لون؟
حد يقدر؟؟
ساحة النقاش