الشاعر عبدالله صبري

إرشق في الهبلة المجنونة
اللي بتضحك من غير أسباب
وتعيَّط لو قُطَّة اتخضِّت . 
توجعها الصُحبة اللي انفضِّت
وتشوف الشمس اللي اتوضِّت 
فتقول هتصلي المغرب فين ؟
حِب اللي بتسأل : بُكرة منين ؟
سيبك م البنت المعتادة
واللي بتتصنَّع بزيادة 
واللي بتطلب قهوة وسادة 
علشان ما يقولوا دي بنت دماغ
حِبّ اللي بتحضن عروستها
وتشوف البحر اللي مفلِّس
فتحط فــ جيبة 12 ساغ 
يا اهبل دا مالكشي غير الهبلة
اللي بتعمل قلبها دِبلة 
وبتكتب إسمك على بابُه
فكَّك م الخلق اللي اتغابوا
واختزلوا البنت فـــ كام حاجة 
البنت العاقلة التلاجة 
اللي أساسا مش محتاجة 
غير واحد يلبس وش عريس
حب اللي تحبك علشانك 
مش علشان كان ينقصها ونيس
قرَّب م التِّنكة المغرورة 
دي الخايفة اللي بتشبه روحك
وجراحها ولاد عم جروحك
وبتبعد علشان طرَّاحة 
والشر صوابع جرَّاحة 
طمِّنها وضُمها بالراحة
وبلاش تتواضعم للتماسيح
إغرق في الفرصة اللي تشرّف
أشرف من قارب قلبُه كسيح 
دوَّر ع البنت اللي فــ روحها
شيكولاتة وعُمق وسطحية 
إهرب م البنت اللي تموت فيك
حِبّ اللي بتفضّل بيك حيّة