نصائح للشعراء المبتدئين ( الرسالة 1 )
1- ما تصدقشي ان الكتابة وحي وإلهام والكلام ده ، سيبك من إلهام عشان هي قاعدة مع خطيبها دلوقتي ، واستخدم عقلك في تحليل الأفكار والمشاعر والبحث عن رؤى جديدة وحاول تدخل للموضوع اللي هتختاره من زاوية ماحدش اتكلم عنها قبلك .
2- من غير فكر وثقافة عمرك ما هتكون شاعر متميز ، يعني لازم تقرأ كتير ، وتتأمل اللي بتقراه ، وما تسلمشي دماغك لأي كاتب مهما كان مشهور أو كبير ، خليك شخصية ناقدة وتعامل بشك مع كل الأفكار .
3- إتعب على القصيدة وبلاش استسهال وبلاش تسرع في النشر.
4- ما تعتبرشي رأي حد في نصوصك نهاية المطاف ، وما تفرحشي بالمديح ولا تزعل من النقد.
5- ما ترغيش كتير مع البنات ، دي ناس فاضية يابا .
6- اقرا كتير في الفلسفة وعلم النفس.
7- فكك من القصايد بتاعة عتاب الوطن ويا مصر يا بايعاني وناسياني وبتدي اللي يخونك وتبهدلي اللي يحبك ، عشان الناس اللي بتقول كدة هينضربو بقنابل نووية قريب ، قبل ما يتكاثروا . الموضوع ده بقى قديم .
8- صاحب الأشياء والكائنات واعتبرهم بشر . وحاول تبني معاهم علاقات خيالية .
9 - ما تقراش لفاروق جويدة ، ولا هشام الجخ ، وما تسمعشي الواد اللي اسمه يوسف الحسيني بتاع ON TV .
10- اقرا كتير عن الصوفية.
11- ما تركزشي قراءاتك كلها على دواوين الشعر ، لازم تنفتح عل كل الآداب والفنون ، الشعر مش مجرد قصيدة بتنكتب ، حاول أن تبحث عن الجمال في هذا العالم .
12- تعلم من بسطاء الناس ، لأنهم أكثر الناس شاعرية .
13- حاول تصاحب المتنبي ، وتعامل مع التراث باحترام ، بس في نفس الوقت خليك ابن عصرك ، وخليك دائما فاكر ان الحداثة في حد ذاتها ليست هدف ، نحن نتحدث عن تجديد وابتكار يضيف للحياة الشعرية .
14- أوعي تتفرج على ريهام سعيد بتاعة صبايا الخير ، أنا باحذرررك اهو .
15- حاول تكتب كلام يعيش وما يموتشي بانتهاء المناسبة اللي انكتب عشانها .
17 - المباشرة مش عيب ، والغموض مش ميزة ، المهم يكون النص فيه جماليات ، ورؤية ، واوعي تفتكر ان الصور الشعرية هي اللي بتخلي القصيدة حلوة . انت ممكن تكتب قصيدة مبهرة ، ومافهاش ولا صورة شعرية .
18- إكره المذيع أحمد موسى .
19 - اسمع أنغام وفيروز كتير .
20- ما تقراش قصايد على الفيس الا للناس اللي انت واثق من إبداعها ، لأن معظم الشعر اللي على الفيس بوك بيساعد على إفساد الذائقة .
21- انفتح على الأدب الغربي واقرا أدب مترجم كتير.
ساحة النقاش