لسّاكي ؟؟!! .... شعر أحمد موسى

لسّاكي ؟؟!!
_____
لسّاكي بتشدّي الرّحال 
وتفتّشي وتدوَّري 
على سكّة الحلم المُحال ؟
ماشيه ف قلب الليل
بـ تِدعي وتندَهي
وبـ تِزْعَقي 
وبـ تطلبي ضَيّ النهار .. 
لَجْل الوﻻد المحرومين 
من لقمة العيش المِغَمّس بالحلال
لجل الغلابة الممنوعين 
من كلمة الحق اللي زهقت م الضلال
مُرَّه الخطاوي 
لو تسير من غير براح .. !
وحشه الليالي .. 
لو تفوت من غير صباح
وسط الصحارى 
و الدّيابة والبنادق والسلاح
شايله حمولك فوق كتافك
والطريق من غير دليل 
تِعتَر خطاكي ف دمعتك 
وتـ بَعّد الحلم البخيل 
لسّاكي ناويه تكمّلي 
يام الصبايا والولاد ؟
يام الهرم والنيل وثومه والقنال
يام التاريخ اللي انكتب من عهد مينا 
وعهد بيبرس وجمال ؟
رغم اللي صابك 
واللي نابك من جراح .. ؟
رغم المآسي والنواح ؟
لسّاكي قادره تشهّلي 
وتلملمي الفرح اللي راح ؟
خايف عليكي م العساكر تمنعك
من إبن فاجر يخدعك ويرجعك
سيري وسمّي الله وإياك ترجعي
الله يبارك خطوتك 
الله معك
الله معك 
__________
#أغاريد الجيل الجديد #أحمد موسى
https://www.facebook.com/agarridgeneration