ركعتين

ركعتين
______
قِمت الصلا
ورفعت إيدى وقلتها 
الله أكبر
وتلوت فَاتِحة الكتاب
حسيت ساعتها إنه إنفتح 
ع الآخرة باب
ولقيتنى واقف ع الصراط
ده انا كنت لسه بقول ياربى 
إهدنى لهذا الصراط
ولقيتنى واقف ع الصراط المستقيم
وانا مش تقِّى
ولا مستقيم
أستغفر الله العظيم من السرح
(القارعة ..ما القارعة........)
من بعد بسم الله ما كانت مفتتح
و ركعت بعد الله أكبر
سبحانَ مولاىَ العظيم
ربى إللي يقدر ع العصاه
لَكنّه
رحمَن ...كريم
سمعت ياربى الحميد لمن حمد
لا ف يوم قطعت الرزق عن كافر
ولا
مستنى شكران من أحد
الله أكبر
واترميت ع الارض ساجد
هو ده الذُل الكريم
سبحانه من عِز البشر ف الذُل ليه
والذُل للمتكبر الكلب اللئيم
سبحانه ربى مِن عَلا 
على كل أشكال العُلا
يارب بابك ماتقفلش على العباد
ليه البيبان بين العبيد
متقفلة؟
الله أكبر
وإتعدلت ف جلستى
مين غيرك إنت يا كريم
يعدللِّى خطوى ف سكتى
الله أكبر
ثم حطيت الجبين والانف
ع الارض ف خشوع
محلى الرجوع يارب ليك
وبين أيادى عِزتك تحلى الدموع
يارب عبدك بين إيديك
ساجد ودمعه بيستغيث
إهديلى نفسي يا إلهى أولا
ثم بقى
باعد مابينى واللعين إبليس
الله أكبر
قمت واقف 
وإختفى الكف الشمال جوة اليمين
بسمله ..والحمد لله
(الحمد لله رب العالمين ...)
سبعه من القرآن مثانى
يبدأو الذكر الحكيم
زى مايكونو كده
جسر الوصول 
الى تحت عرشك يا كريم
قلبى من خشية لقاك
بين ضلوعى بيتنفض
أستعيذُ من الشِيطان
بسمله
(قل هو الله أحد....)
شهدت لك بالوحدانية يا ملك
ولنبيك بالرسالة
سيد ولد آدم محمد
خيرُ خلق الله تعالى
فاما قلت الله أكبر 
قمت راكع
لجل أسبّح ربنا الهادى العظيم
وأفتكرت كلام حبيبي لما قال
قل آمنت بالله الأحد
ثم استقيم
سمع الرحيم لمن حمد
اللهُ ربى هو السميع
مِن عاش ف جاهك يا ملك
دخل الحِما
ولا حد يقدر يكرهه 
ولا يوم يضيع
الله أكبر
قمت لابس فوق جبينى
تاج كرامتى 
بالسجود
قلت سبحانك يا ربىَ الأعلى
ف ملكوتك
يا حَىُ يا ودود
الله أكبر
فأعتدلت وقمت جالس
منتشى وهادى وسعيد
أحلى شئ ف الدنبا إنى
ع الطريق اللى مابينه _جل شأنه_ والعبيد
الله أكبر 
كانت السجدة الأخيرة 
سجدتها وسبَّحت ربى
سبحانك اللهم يا منَجِّى
من تصاريف الزمن والمستخبى
سبحانك اللهم 
يامولَّى الملوكِ
ياأحد
سبحانَ من حىٌ يدوم
بغير صاحبةٍ تكونُ ولا ولد
الله أكبر
فإعتدلت للتشهد والسلام
والتحَايا الطيبة
والصلاه على خير خلق الله أحمد
إبن آمنه الطيبة
واما خلَّصت التشهد
وإستعذت من المسيخ
ومن الفِتَن 
ومِمَّا فى القبر الظلام
كان ختام أول لقاء بينى وبين مولايا
رحمة قبل بركه
قبل منهم كان سلام
_________________
أغاريد الجيل الجديد/ ياسر رزق
https://www.facebook.com/abosaadkw