أغاريد الجيل الجديد/ هاكتب وطن

أغاريد الجيل الجديد/ هاكتب وطن
______________
هاكتب وطن
هاكتب وطن
على قد حلم اللي اتسجن
واللي اتظلم
واللي اتشبح واللي اتنبح
واللي اتحرم

هاكتب وطن
هاكتب وطن
على قد غل اللي "اتعكم"
واللي مالوش
أو ممعهوش
واللي الشاكوش
واللي (الطالوش)
عرّق جبينه
وما ادلوش

هاكتب وطن
خالي من الزحمة
وان كان ضروري العلم
يبقى العلم رحمة

هاكتب وطن شفاف
من لوني/ من طيني
من 600 مرحبا
من ألف بيت طيني
من كل عين أحرسه
واطلق شياطيني

هاكتب وطن من غنا
من ريحتي وملامحي
أملاه غيطان أطفال
وابدر عليه قمحي
يكتب علية الرضا
واكتب عليه
وامحي
هاكتب وطن

هاكتب وطن لونك
وأوزن حروفه بضي 
لو بكره بيخونك
ما هو بعده لسه جي 

هاكتب وطن زيّك
حبوب وشكله يخض 
ما أنا حرفي من ضيّك
في المستحيل بتعض 

هاكتب وطن وأسكت 
وأخرس كمان وأتهد
هستنى ليه ردك ؟
من امتى جاني الرد ؟؟!!
هاكتب وطن 
من غير حدود 
من غير حرس 
من غير قيود 
هاكتب وطن 
مافيهوش سجون 
ولامرشدين ولا بصاصين 
ولا فيه ولـــى او تابعين

هاكتب وطن 
مافيهوش فقير ...واكل ظلط 
ولا فيه رئيس جاى بالغلط 

هاكتب وطن 
وارسم ملامح سكته 
من غير جراح 
وارسم جناين وارسم بحور 
وازرع وطن جوه الوطن 
هاكتب وطن 
هاكتب تاريخ 
هاكتب غناوى 
واكتب حكاوى 
واكتب اسامى ولاد الوطن 
ماتو الولاد ....عاش الوطن 
هاكتب وطن 
_______________________________
http://www.facebook.com/abosaadkw