قناة حبك
__________
ولسا الحلم بيعافر
ما بين القسوة و المشاوير
مسافر و البحور أسرار
و قلبك قارب التفسير
باتوه فـ عنيكي من بصة
يا أجمل سطر في القصة
قناة حبك باقات خاصة
و روحي بتعشق التشفير
"باتوه فـ عنيكي من بصة"
فتبدأ في الغيطان قصة
هنا رَصّة وهناك رَصّة
أقول سبحانه مِن وصّى
يكون للمحتاجين حِصّة
واتوه فـ عنيكي من بصة
ريموت قلبك يدوب طارح
زراير عاشقة أنغامها
تعلّي ضحكها بضغطة
وترمي سرها فـ البيــــــر
نفك طلاسم امبارح
ويبقى الحلم مش جارح
يا سر اتذاع فـ ليل سارح
وعقل بيغزل التفاسير
تَملي لحرفي حبّابة
تِملّي الشعر بطيابة
وخايف تبقي قلاّبة
يتوه المعني في التفكير
قمر طارح مواويله
بيسرح في العيون ليله
وينده عالقلوب ترمح
عليه شايلة الحنين مشاوير
بخاف أتخبى في ضلوعك
بخاف م الضي في شموعك
قوليلي بس هكتب ليه
وأنا عشقي بدون تأثير !
وحالف لعشقك سواح
وقلبي ليكي كله براح
يا راسمه ع الوشوش افراح
وشاغله البال بشكل خطير
ويفضل عشقى متواصل
واعيش حُبِك بدون فاصل
وده حالى ودا الحاصل
ولا هـ اطلب فـ يوم تغيير
ساحة النقاش