حَجَر المُورَدَة........ الشاعر عبدالناصر احمد
واحنا في قَعدِة مُغرمين
أنا وحجر المُورَدَة
خَدنا للماضي الحنين
وراحِت عقولنا شارِدَة
لِذكرياتنا مِن سنين
ساعِة ما كُنا صغيرين
المَيَّه تحتُه بِتِغمُرُه
باردة وزُلال للعطشانين
ساعِة ما كان في الدّنيا خير
وطيّبة قلوب البَشَر
نِسمع أغاني عَزَفها طير
أوتارها غصن الشجر
والسما فْ عِز الهَجير
تجود علينا بالمطر
عَ الموردة يِحلي السمَر
يبتدي ساعة السَّحَر
لحَد ما يشُق السّما
ضَيْ القمر
**********
وغلِطت مَرّة مع الحَجَر
لمّا سألتُه مسألَة
عُمرَك يا صاحبي كام سنَة ؟
ردّ عليا بصوت حزين
موجوع وقالها لي بأنين
لا ابوك ولا جدّك ولا
ولا جد جدك يِفتكر
أنا هنا
ولا كَنشي لسّه الكون عِمِر
من زمان فات وجَبَر
طول السنين شارِب مَرار
وحارس حبيبتك مِ الخطَر
- لو نازلة يوم تِملا الجـرار
وراح قدمها فيْ عِتِــر
حامسك إيديها واعتذر
**********
وشوشني حجر المورَدَة
بصوت واطي ومِستِحي
أنا ياما زَغزَغت الصبيّة
في رِجْلها....وسمِعتها
وهي بتِفشي سِرّها
مين هو فارس حِلمها
وشُفتها...وهي بتكسر حتّة مني
تنعّم بيها رِجلَها
عَ الموردة... زعَقت وقلت بحبها
وكنت استني ودّها
وردّهــــــا
الرد كان صوت الصدَي
ومعايا حجر الموردة
**********
وكان علي طول البلد
أربع مَوارِد معروفين
مُورَدَة لملْي الزّيار
أولها مفرود الشّبَك
والتانية لغَسل الهدوم
والتالتة منها نِعوم
والرابعة لصيد السمك
ولحكاوي المحرومين
غير العِيدان المنصوبين
بيجرّها عوّاد جَلَد
مسلّم وراضي بالقَضا
يِروي الأراضي المزروعين
واقضّي يوم من غير غَدا
فوق حجارة الموردة
اصله كان عندي فَضَا
ولا كنا لسة مشغولين
**********
وانا واقف معَ الحَجَر
لقيت مراكبي فْ مركبُه
محمّل شَوايل مِ الحبوب
جِسمه نحيل من القَهَر
ومِن التعب عايز يتوب
وكان بيستنّي الرياح
مركبُه رايح جنوب
أيام بينتظر الهُبوب
عَمّال بيفرِد في الشّراع
في كل ناحية وكل صوب
دخَل مع الريح فْ صِراع
عَمَل معاه كل السّبُل
ومفيش أمل
ولأنه مؤمن بالقدر
لا يوم كَفَر ولا يوم فجَر
الريح خلاص بيهم بَطَش
حَبلُه فِ وسْطه حزّمُه
عايز يعيش
وأكْل عيشُه بِيلزِمُه
ما هو كان مفيش
عَ الموردة يِشِد الحِبال
صبرُه ولا صَبر الجَمَل
علي الجوع وع العطش
والقوة فيه قوة جَبَل
**********
وفي المدَي ... صيّاد بدا
يرمي شباكه الهلكانين
وعرَقه نازِز عَ الجبين
فوق تجاعيد الزمن
خايف يِبات من غير عَشَا
هو وعيال مِستنّيين
كان الشّقا وكان التعب
فوق حدود الإحتمال
مع إنهم كانوا عيال
كان حِملهم فوق الخَيال
**********
ويوم وصلت للبلد
قلت اروح المُورَدَة
ألملِم شويّة ذكريات
وقعدت ادوّر عَ الطريق
لقيت مباني مرصوصين
وكل المداخل مُوصَدة
سألت راح فين الحَجَر؟
ولاحد من أهل البلد
عايز يقول إيه الخَبَر
صاحبك خلاص مات وانتحر
ودَفَن نفسُه فِ القَعَر
وبكيت علي صاحبي الحجر
وعرفت ليه هو انتحَر
تقدر تقول هو انفجَر
أو يكون بيه اتغَدَر
وكلّه من فِعل البشر
كان نفسي اشوف صاحبي الحجر
ساحة النقاش