الساعة كام ......؟
للشاعر : محمد ضباشه

الجمعة زى السبت
وأه كلها أيام
تشبة ساعاتها لبعض
ومافيها حاجة تمام
والليل نلقاه شبهنا
بيقول بكرا قريب
أقوله لما يجى
وأنا وأنت والنصيب
هيجى يوم الحد
وهلقانى معاه غريب
وأستنى يوم الأثنين
وادعى واقول يارب
ترضى عنا الحكومة
وما نعيش معاها فى كرب
--
الجمعة زى السبت
والحد شبه الخميس
والناس تايهة وحيارى
واليوم اصبح كبيس
والشمس لونها باهت
على اللى اصبح عريس
على الكرسى قاعد بيه
والناس بتموت فطيس
--
الجمعة زى السبت
وبعد بكرا اثنين
ووعود سمعتهالى
من سنه وأثنين
وحلقى لسه ناشف
وسلاسل فى الأيدين
وتقولى بكرا أحسن
يا عم بكرا فين
وأنت طابق فى حلقى
وهواك عامى العنين
اليك يارب نشكى
وأنت يارب المعين
--
الجمعة زى السبت
والاثنين وراه تلات
وكل يوم بنشوف
أمواتنا بالمئات
والحرب لسا دايرة
والخير عدى وفات
واللى رفع علمها
فى ميدانها يا عينى مات
واللى نادا بخضارها
فى السجن يا روحى بات
المهم ياكلوا قشطة
والناس تاكل فتات
--
الجمعة زى السبت
وايام تجر ايام
كان نفسى قبل ما موت
اكل جوزين حمام
واشرب النس كافيه
وابقى واد همام
أركب أتوبيس مكيف
وماتشعلق فى الترام
والبس هدوم نضيفة
مش توب لون الضلام
ولما قعدت افكر
وقلت أروح أنام
لقيتك زى ما أنت
كلك مليان كلام
لكن عمرى ما هيأس
ولا أقول فى يوم حرام
مادام الحلم شوفته
وأنا نايم فى المنام
ووسادة تحت راسى
باين من ريش نعام
أن أنا جوه قصر
حيطانه من الرخام
والناس مبسوطة خالص
ومفيش هناك زحام
ولا فيه عيون تدمع
ولا حد يقول حرام
ولا حد بشوفة يرمى
على الريس بالكلام
ولا حد يقول يا بيه
طريقتك مش تمام
وجوه القصر حنة
وأنا بحلم بالمدام
صحيت على صوت يقولى
يا بابا الساغة كام
بابا الساعة كام
الساعة كام
كام
كام
كام