عرض ودانك وانحنِى
للمنحنَى
لو قلت شِى
ما تختشى ترسم دواير للأنا
وتزف عرسك على العرايا
والرتوش
واللى غابوا
ف النعوش
واللى ضجو م الغلا
والمبتلين وسط الشوارع
والرصيف علِّم عليهم بالبِلا
صنَّفت يا ولد الأبالسة
واخترقت العزم فيهم
والصلا
الريح بتحصد عصفها
ورق الفقير مالوش عنوق
والقز فارق منهلا
ما تهدنيش وتقولى إمسك
سبحتك
خليت فؤادى ضالتك
ورمتنى ليه ليعدنى
جندى ليه
ومخدَّة إيه
ناعمة لخده وفركته
من حقى اضيع
ف سرحته
لو كنت بلِّيت العروق
وأخدتنى
من قبل ما تغرَّبنى جوعة
أو شروق
كنت هاصمد للبحار
مجدافى حر
وقلبى يغمره النهار
وحاسبتها
إن الوطن مغروس فى دمى
والبسملة
هاتزيح ف همى
واقرا كهفى للسكارى
والحيارى
والتتار
الأمور لفت دماغها
من صداعها
مش قادرة تعرف من يبكِّى
ومين يضحَّك
ومين يزغزغ بالعمار
التوهة فاحت ف العيون
والشوفة ناحت بالودان
والكل خايف
يدلى بصوته للميدان
الكل راهن
والكل مشدود العنان
بكره هايطلع
ولا
راح نعود
للى حطَّم قلبنا
وزرع كلمة جبان
