الميرميــــــــــــــــــــة................................ بقلم / دكتور داود فلنة

الميرميــــــــــــــــــــة
ـــــــــــــــــــــــ دكتور داود فلنة

قالتلي ستي
أقعد وإهدا
لو تعلمت حلاّق
وربنا خلاّك
مش أحسن من الصحافة ...!
قلت يا ستي
ما تذبحيني ع العتبة بكلامك
خليني منك ومن أوهامك
كيف آخر الليل احط راسي
وأنام على مخدة
وشو أحكي عن شعب
لأسطورة اسرائيل إتحدّى
بأنتفاضة قوية
جابت زلم تونس وبيروت
بسلطة اسطورية
حملت الختيار بتابوت
على طيارة فرنسية

* * *
نومتيني كثير بخراريفك
الشاطر حسن وأبو زيد والحدّا
أجى دورك تسمعيني
يمكن أنك تفهمي يا جّدة
أنا انقطمت نصين
النص الأول بدل حيفا
أخذنا جبل القرعة
وجنب الميديا نلقّط ميرمية
ما تضحكي ...!هي قليلة الميرمية ...!
لما أخذتها بشنتطي على أميركا
حللوها في المطار
لاقوا جذروها فلسطينية
أقسمت بالله
في جبل القرعة بتطلع بغزارة
وهذي حصتنا
من أولاد عمنا القذارى
وما معها جواز سفر
تطلع برة في زيارة
ما بتعرف ابن لادن
ولا وين ساكن
في شنتطي حطتها الختيارة

ما فهموا عليا ..جابوا مترجم
طلع يهودي ...شم ريحتها
اتحفظوا على الكمية
قالوا يمكن تكون ارهابية
تذكرت يا ستي ام مصطفى
لما كانت جاية على اللد
بطيارة اسرائيلية
اعتقلوها في القاهرة بتهمة ارهابية
عشان كانت لابسة جلباب
وعينيها مخفية ....!
أبشرك يا ستي
السلطة بدها تبني في جبل القرعة
جامعة أهلية
هيك سعر الميرمية بصير في العلالي
والنفس بطير في الملاهي الليلية

* * *
وبدل الرملة واللد
شجرتين زيتون رومية
وحدة مسوسة والثانية على نيّة
وبدل يافا وعكا واسدود
عنبة وثلاث تينات برية
الجدار أخذ وحدة
ظلين ثنتين
وحدة في بلعين والثانية في نعلين
هيك المجموع سبعة في المية
واذا حسبتي المسوّسة وجارتها
بتصير الحسبة خمسة في المية
وطرحتي التينة اللي في الجدار
بتظل ثلاث في المية
وحسبوا بالدولار الضريبة على الميرمية
بنطلع مطرودين
وبوخذوا بدالها اثنين في المية
من جبال أم قيس
أو نهر اليرموك
بفتحوا على طبريا
شفتي يا ستي
لو الزيتونة مش مسوّسة ...!
كنا حمينا الضفة الشرقية

وهذي لعبتهم
من سنة السبعتش
للألفين واتنعش
وشوية شوية بصلوا خيبر
وبغداد الأبية
ما تحكي عني ملعون
شو هالحسبة القوية ...!
هو قليل شجر الزيتون
اللي أقسمت فيه الذات الألهية

* * *
وبعدين أخذوا النص الثاني
وسجلوا في المحكمة أنا الجاني
عشان كتبت في الجريدة اليومية
بتقولي ستي
ما تحكي نحوي
احكي بالعامية
قلت ما بفهموا عليا الحرامية
نسبتهم عالية في غزة
والضفة الغربية
قربت تصل نسبة حلمنا في فلسطين
مية في المية

** **
الله يستر اليوم ما يصير
تفجير في تل ابيب
لعبة موساد ومرات بتصيب
بلّموا الشباب
اللي رايحين غربة تهريب
لأنه شرقة فساد وتخريب
الشباب اللي كانوا في الأنتفاضة ثوار
كانوا يرشوا مية نار
على البنت اللي مش لابسة خمار
ولما اجت السلطة بعدين
صارت البنت تلبس العَمرين
مافي بلبسها أي ذوق
عمرو ذياب تحت
وعمرو خالد فوق ....!

* * *
وبعد السلطة الأبية
وجهنا للأحتلال صفعة قوية
أعلنا دولة وأخذنا هوية
صارت خضرا بدل برتقانية
كسرتنا حجارتنا وخبينا البندقية
واجاها يوم يا كبر رووسنا
تطلع في وجوهنا يا الفلسطينية
وبلشوا للبلد بلع
ومرتي صارت تشرب حبوب منع
باعوا الأرض والبلد
وأحنا بعنا البنت والولد
مرت المدير العام مطبقة النظام
كلب الشيخ شيخ واسالوا
الشيخ في وزارة الداخلية
ما احلا فواتيرها ..أطول من تنانيرها
نطّت في الشهر العشرين ألف
والمدرسين ما اخذوا رواتبهم
جيوبهم بتنقّط بدها بلف
سرقوا المي من الحنفية
والكهربا من العامود
والفاتورة برضو أجتهم ستمية

اللي عبوا الكروش بالقروش
بلعبوا لعبة الطماية والحرامية
مع كل دولة لهم دور
للنظام بلطجية
وكانوا قبل السلطة عملاء كبار
وهم اللي صفّوا القضية
تصاريح زيارة ولم شمل
وبالدولار الهوية
صاروا كلاب كبار
في المكاتب الخلفية

* * *
في سويسرا ألفين شرطي
وعندنا خمسين ألف قوى أمنية
بعتقلوا أصحاب العمليات
واللي خلفوا السلطة الوفية
بجيش اسرائيل المرعب بلا جدال
خمستعشر جنرال وأحنا أربعمية
عندهم تسعتشر وزارة واحنا اربعة وثلاثين
ليش العدد عندنا الضعف زايد
ظلوا سبعتش
من اللي سرقوا مصاري زايد
وزيرهم بدرجة مدير
وأحنا وزيرنا بمرتية أمير
خلّى الوزير لأبنو الصغير
وزيرهم بركب هيونداي كورية
ووزيرنا بركب همر مصفحة نووية
وزيرهم بدلته من الدار مكوية
وأحنا البدلة والدار هدية

* * *
دونم الأرض في غزة بمليون
وفي رام الله بخمسمية
بنوا ناطحات سحاب
كثرت النوادي الليلية
ببيعوا حمص وكباب في الطوابق السلفية
وعشان شباب الجامعة أخلاقهم عالية
عملولهم الكوفيات شوب في الطوابق العلوية
صارت على الأرجيلة أحسن من الشاب
بتنفخ البنت الفلسطينية
وامها الحزينة في الدار
بتنفخ على ورقة المية
باعت خاتمها لتدفع للدكتور كشفية
وتشتري خسة بثلاث ليرات
وبليرتين ضمة ملوخية

د. داود فلنة