لسه بحبك ......................................... بقلم الشاعر/ عمر علي حسن

لسه بحبك .. 

عدى حروف ممكن يكتبها 

قلم ف اديا 
على كام ورقه 
بذوق وبرقه 
وباحساس لو ترضى عليا 
شوفى كام نظرة شوق حواليكى 
تبص عليكى 
تطرح عشق يبان ف عنيا 
لما بشوفك 
واسرح وانتى بتحكى ظروفك 
بنسى شويه 
وانتى معايا 
الف الم خدته على قفايا 
من عسكرى جيش او داخليه 
ودا مش عزا ياحبيبتى ف حالك 
ولا لوم حتى هتاخديه ف بالك 
ما انا عارفك ف القسوه قويه 
سجنى ما عمره فرق وياكى 
ادخل واخرج كدا والقاكى 
زى ما قالوا عليكى بهيه 
بس بحبك 
روحى تروح لو تبعدى عنى 
اصل انا منك 
لحنك منى 
وانتى هديه 
بحلم تيجى يوم بقى وتفوقى 
وتشوفى نفسك 
تتمخطرى بقى كدا وتروقى 
للى ياغاليه ف حضنه يحسك 
حره ابيه 
شوفى كام ذكرى بقوا ف برواز 
ولا شباب ماشى على عجاز 
شوفى كام واحد خدوا اعدام 
لافى احراز ولا حتى قضيه 
ولسه بحبك
اه بالله انا لسه بحبك 
مهما يكون انا هفضل جنبك 
مش راح اسيبك 
اصل حياتى يابت ف قربك 
دا انتى ما ليا 
وانتى جبال الصبر ف حملى 
وانتى الفرحه اللى بتمحيه
لو يوم بغضب والعن حلمك 
بطبطبى على قلبى الطيب وتهديه 
اصلك لساكى جواه حيه 
لساكى عشقه وحلمه وامله ولساكى طيفه 
لساكى فاسه وقلمه وسيفه 
لساكى صمته وصوته 
حياته وموته 
ربيعه وصيفه 
شتاه وخريفه 
والايام لحياته الجايه 
لسه بحبك 
‫#‏الاثر_المفقود‬ 27/5/2015