صبااااااااااااح الفل يا ست البلاد

... صباحك حرية برغم اللي فات 
صباح الفل على عيونك يا سمرا...
مش حب ...  
ولأنك 
كل خطوط الطول والعرض
لأ ... والسنة كمان والفرض
الحبل السُريّ الواصل بينيِّ وبين
تسابيح الله 
والحضرة لكل الدراويش 
ورغيف العيش
ومجرة كل المدارات
و انا دايب فيك ....
من ساعة ما المولى ما ملِّس 
علي جتة آدم 
من قبل ما ينفخ فيّا الروح
ولا مرة ب ابوح
ولا بنطق اسمك
وبخاف ل فمرة أنادي عليك
والاقيكي ف حضنيِّ 
أموت م الخوف
وتفِر الروح
من جوه الجته المصلوبة
علي باب الشوق
وتدوب فى النور
وتروح لبعيد
وتلملم قلبي المتبعتر 
علي ميت فدان
مش عاشق إني أموت في الغربة
ولا فيها أضيع
ولا ادوب ف الحزن اللي بيضحك
في وشوش الناس
أنا عاشق بس
أدوب ف عنيك
وف ليلي اناجيك
وأحنّي برملك قلبي البور
واقضل أغني
واغني واغني 
لحد ما يسكر نهر النيل
وتطلي عليّا من الشباك
وساعتها ... 
أجيلك متحني
متوضي و بدمع إيزيس
وإن مُتْ ...
ولادك تدفني
علي باب الحارة
فى رموش البنت اللى بترقص
علي شط النيل 
فى ضفاير القلعة اللى بتنده
علي بيت القاضي
ويخضروا قلبي المتبعتر
بجريد الوادي
وضحك النيل
ده لإنك ....
كل خطوط الطول و العرض