المركز الثانى مكرر زينب محمد بدران مصر عن قصيدة غربة وطن
)غربة وطن (
ع الشط
مد البحر؛ والموج اتحنى
كان جنبنا
والحلم تايه وسطنا
ومالوش قرار
تعب الهدوء من صمتنا
قرر خلاص
ساعة الرحيل
لحظة وداع..
فرد الشراع؛ شد الوتر
غنت حبيبة قلبنا
) شمس الأصيل (
لوح بإيده للوطن
مبقاش على أرضك أمل
صوت الرصاص؛ زرع الملل
ضيع علينا حلمنا
موت قلوب العاشقين
قتل الحنين
واقفة حبيبته تودعه
مادة الرموش
خلف السفينة بتحضنه
وعرقها سايل ع الجبين
صرخت بصوت؛ شق المدى
رشقت في قلب المركبة
حبة آهااات
حاول يعيد الدفة تاني
عندها
شد الحبال
في يمين.. شمال
ظهر الخلاف؛ زي اللي كان
جوه الوطن
الكل عايز كلمته
صوت الرصاص دوى
وناره في السما
نطت حبيبته تستغيث
مسكت في موج الجذر
راحت مننا
فاتت ساعات
رجعت وموج المد شايل همها
باست تراب الأرض؛ قالت
ياوطن
احنا اللي غربناك سنين
واحنا اللي قطعنا الأمل.