المركز العاشر مكرر محمد احمد نبيل مصر عن قصيدة أصلك يامصر امى
أصلك يا مصر أمى
يا مصر أنا ابنك ..
راجعلك..
أنا محمد وأحمد.. ومينا ووليد
أنا ابن أرضك...
سَمَاكِ ..
جبالك.. سهولك ..
والوادي الجديد
أنا ابنك حبيبك ..
أنا ابن سينا..
وابن بحري ..
وابنك ف الصعيد
رضعة من نيلك بداية حياتى..
مَيِّته بتجرى جوَّه الوريد
راجعلك عشانك ..
علشان ولادك..
اللي عايش ف أرضك..
أو مسافر بعيد
جىّ آخد بإيدك ..
وعلى كتفي أشيلك..
قرآنك ف قلبي, وعهدك جديد
يا أمي يا غالية ..
وفوق راسي عالية...
دمّي فداك, وبروحي أجود
ف شرقك ف غربك ..
شمالك جنوبك ..
واقفلك مرابط أمام الحدود
ومفيش مشاكل ..
أحارب واشاكل ..
فدا ترابك...
سَتري وغطايا لما أبقى شهيد
مايهمنيش افتكرني حدّ أو نسيني ..
أو حطّ على قبري الورود
أصلك يا مصر أمي..
أرض أبويا وأمي ..
دانتي أرض جدي .. وجد الجدود
ولو مرة زعلت ..
ومع أخويا اختلفت..
أرضك بتجمعنا .. ولحضنك نعود
زمان بنينا سد عالي ..
وآدي احنا جاهزين نعلِّي ..
ألف غيره م السدود
مباني وصناعة ..
تجارة وزراعة ..
خيرك لأهلك .. ولكل الوجود
جاهزين نعيد لك ..
يا أمى مجدك ..
ونخلدك خلود .. فوق الخلود
