.............** عجيب.. عالم الحب !!! **...............
-------------------------------------------------------------------
الحب غالى قوى... ما يتّاقلش بمال
الحب لو كان حقيقى ..يبقى دا الرسمال
الحب ما ينشريش.. وما لهش سوق للبيع
الحب هوه الحياه... من غيره كنّا نضيع
.......................................................
الحب ما لوش قانون... ولا له ميزان ومقاس
تلاقى واحد جميل... بيحب له نسناس
وتلاقى واحده قمر ... متجوّزه غوريللا
تسأل تقول لك حبيبى .. إمشى يا جبلّه
........................................................
قليل ونادر قوى.... لو شوفت متكافئين
وبرضه حتلاقى منهم... عنده فراغة عين
ممكن تلاقى قصير... بتحبّه عود خرزان
وتلاقى واحده طويله... بتحب قزم جنان
...........................................................
وتلاقى بيضه وجميله... بتحب زول أسود
وتلاقى برضه ابو سمره... عاشق غزال أبيض
وتشوف شجر جمّيز... بيحب غصن البان
وتشوف جميل المحيّا ... هايم فى أبو قردان
............................................................
دنيا الغرام دى عجيبه... احتار فيها العاقل
مفيهاش إجابه لسؤال.. للى يكون سائل
الحب والعشق فى الدنيا... أحاجى حلّها عاصى
تتعب قوى لما تبحث... حتقول ينا ياراسى
..............................................................
ورغم ذلك لا يمكن .... الغنا عنّه
بالحب تبنى الأسر ... وبيه بيتهنّوا
بالحب تبنى البلاد.... والكره يهدمها
يا ريت يا كل البشر .. تكتّروا منّه .
.........................................( رفعت فايد ).
