غربة وطن
*********

جواك زنازين الحياة

مكسيّة بجحود الوطن

لسّاك غريب

رافع رايات الإنكسار

لوحة شرف

والليل على جدران شقاك

قاسى وعنيد

صوت السواقى المدبوحين يوم الجفاف

مالهوش صدى

يا خيال مآتة مشققة فيك العروق

اجرى ف مكانك

واوعى ضلك يسبقك

ف نهار بخيل

فيه الغروب زى الشروق

وعكار يا نيل

حضنك يحل المسألة

لو لسّه باقى فوق ضفافك نخلتين

مافيهومش سوس

الطلع عالى يا بلد

واللى سقط كان الدليل

يوم الحصاد مالهوش ميعاد

والخوف صحى لحظة ما مات

ف عيون بنات شايلة الكفن

بتفصله فستان فرح

وتلف تسأل ف القلوب قبل البيوت

عن عود وتد

كل الشوارع مسدودين

كل الحلوق متمددين فوق الحيطان

علامات سكات

على كل باب حلم اتوئد

وعيون كتيرمتحجرين

فوق الكفوف المطبوعين فوق الرصيف

شُق الحجر

واعلن مخاضك يا وطن

ابابيل صراخك ف السما مالهاش عدد

واكتب على شهادة ميلادك كلمتين

بنت وولد