(( اللى يعيش ياما يشوف))
البشر فى الدنيا أشكال وألوان
واللى يعيش ياما يشوف
فيه اللى عايش صحيح إنسان
وفيه اللى عايش حسب الظروف
فيه اللى غرقان فى الأحزان
وفيه اللى بتوب الفرح ملفوف
وفيه اللى الدنيا إديتله الأمان
وقالتله عيش وإنسى الخوف
وفيه اللى بيحلم بلحظة نسيان
علشان ينسى الهم المألوف
وفيه اللى فقير من فقره خجلان
وفيه الفاجر أبو وش مكشوف
وفيه اللى بهدله الزمان
وعايش بشرف مش مكسوف
وفيه الضعيف اللى ملوش مكان
ومبيلاقيش غير ضرب الكفوف
وفيه اللى له مليون مكان
وبيتعمله تعظيم سلام موصوف
وفيه اللى بيشقى ويتعب علشان
يجيب لقمه تخش الجوف
وفيه اللى إتولد لقى حياته بستان
ومعنى الشقى من حياته محذوف
والبشر فى الدنيا أشكال وألوان
واللى يعيش ياما يشوف.