جارى التحميل
استخدم زر ESC أو رجوع للعودة
افتخر اني فلسطينية
وجدودي اصلهم مصريين
اقول كلمة الحق
لوهينكرها الحاكم ويدين
وطني وترابه هم الاغلى
ميتقدروش بالملايين
كرامتي وابائي تاج راسي
لا بركع لعدو ولا بلين
ميهمنيش سوط الجلاد
ولا بتكسرني القضبان والزنازين
لو بكمامة كتموا صوتي
قلمي هيتكلم ويزأر
اصله اسد في عرين
جوايا صرخة شعب ووطن
لو سمعها الحجر هيبكي بانين
يا ام الشهيد صبرك
اجرك واجره عند رب العالمين
ابنك بطل يشهد على كده
الاقصى وغزة وكفر قاسم وجنين
انا مش هاسكت ...قلمي الحر هيكتب
عن بطولات شعبي ..روايات ودواوين
هاكتب عن عروسة
فستانها الابيض تمرغ بالدم والطين
عن طفل صغير ..
حرموه من ابوه...من فرحة العيد ..
عالشوك مشوه تجرحوا الرجلين
عن بنت بظفاير
مستنيةرسائل الغايبين
عن جدي اللي شرب الحسرة
عن ابويا اللي خرج من الفجرية
عشان يفدي بروحه فلسطين
عن شباب ثائر جوه الوطن
وعن شباب متغربين
منكرش فضلك يا قلمي
بدمعك الاسود يا غالي
يا ما كتبت عن الشوق والحنين
ياماكتبت لحبيبي
لما غيابه طال وبالوصل كان ضنين
كتبت عن فرسان وبطولات
عن حرب وسلام
عن علم وادب ودين
عن ناس اتغربت
وناس خدهم الموت مننا
عن ليل السهر ولوعة العاشقين
يا ويلك يا عدو مني
هافضل ملكة بقلمي
وكلماتي هتفضحكم يا سفاحين
اخواتي هناك بيحاربوا بسلاح
وانا هنا سلاحي قلمي
مش هينكسر ولا هيرشوه الخاينين
ده هوحبيبي اللي مبيتخلاش عني
ان ضاقت بيا الحال
برتمي بحضن الورق اشتكي همي
بيكتب فرحي وجرحي قلمي الامين
وهافضل فلسطينية حرة ابية
قلمي الحر سلاح يرعب العدو
هاحارب فيه الكدب والقهر
والظلم والمحتلين
مع تحيات جريدة أخبار نجوم الأدب و الشعر
رئيس مجلس الإدارة ورئيس التحرير الشاعر / خالد بدوي