فاتح دولابى وأقلبه
أدور حروفى المؤمنه
مالقيتش غير كم الآلام
حروف نيام متعفنه
وكلام كتير موش ف المحل
داير يسوق ف المسكنه
وحروف كتير سايبه المكان
فوق الرفوف متسكنه
وحروف بترفع لأجل تفضل
ف الأمان متأمنه
وحروف بتنصب عالخلايق
بكلام يضايق محزنه
وحروف بتكسر للسليم
صنف ولئيم فيها الأنا
وحروف سكوت متعودة
عالصمت تقعد ساكنه
وحروف بياض وحروف رماد
وحروف م الإسود داكنه
حتى الحروف من كتر خوف
على كل لون متلونه
وحروف غزل عفيف صريح
وحروف كمان متمكنه
وحروف كمان للمعرفه
حب ووفا ف الركن ده متأمنه
كل الحروف من بين رفوف
تايهة ماتعرف مين أنا