‏‎‎‏

يا مصر يا إلي .. هواكي ما لي .. عاشق تملي .. سارح في أرضك .. لحظة تجلي .. واقع في عرضك ... لمي عيالك .. بإدين رجالك .. يتلم مالك .. و نصلي فرضك .. خلي صليبك يحضن هلالك .. يظهر جمالك .. و تسدي قرضك . يا مصر يا إلي الحب فيكي ما ينتهيش .. عاشق ترابك .. و غيرك إنتي ما يهمنيش ..عشقت فيكي فلاحة سمرا .. بنوته حلوة بفيونكة حمرا .. عيل صغير حاضن كتابه .. دعاء من إمي لجل إلي غابوا .. و توبه طاهرة من إلي تابوا .. عشقت فيكي طيبة عيالك .. و حسم شدة عيون رجالك .. و بدلة ميري .. صحت ضميري .. قالت لغيري .. وقف مكانك .. مصر إنهردا مهش مكانك .. عشقت فيكي فول عم جمعه .. لمة صحابي و الحاج سمعه ... حنية إمي .. طيبة أبويا .. ضحكة حبيبتي .. غلاسة أخويا .. عشقت فيكي نسمة عصاري هلت في داري .. ترمي المحبة .. و تبقي حبه .. تروح لجاي .... أرضك غناوي .. نيلك حكاوي .. و أنا كنت ناوي .. ألف و أجري علي القهاوي .. و أقول حكاية .. إلي باعوكي .. و جماعة إلي لما خانوكي .. و إلي بيلعن ميتين أبوكي .. و أحكي عن إلي .. واقف معاكي .. شايل حمولك و جاب دواكي .. ألفين تحية للي هواكي .. و إلي بدمه علي طول فداكي .. أكتب كلامي .. و أسيب غرامي .. سارح معاكي .. علي شط بحرك .. يسرح في سحرك .. يكتب أغاني .. بأحلي المعاني .. لتراب حبيبتي . و عشقت فيكي برج الحمام .. إبني الصغير لحظة ما نام .. عشقت فيكي جدي إلي مات .. ستي إلي عايشة وسط السكات .. ضحكة موظف ساعة الماهية .. يحمد و يشكر .. يسكت و يصبر علي الأذية .. عشقت فيكي حبة غلابة .. ضايعة حقوقهم وسط الديابة .. صابرين يغنوا علي الربابة ..
كتبت فيكي أشعار و ياما .. فيكي إلي قالوا لولا الملامة .. فراعنة إحنا و طيبين .. أقباط بتحضن المسلمين ... علي أرض واحده .. و نيلنا واحد .. و الرب واحد للعالمين