جارى التحميل
استخدم زر ESC أو رجوع للعودة
الأخـــــــــــــــــــوة
يوم سألتوني يا سادة
يبقى إيه معنى الأخوة
الإجابة لقيتها ساكنة
بين حشايا القلب جوة
حد ترمي عليه حمولك
ينسند ظهرك بقوة
حد يعني بجد تقدر
تشتكي – لو منه هو –
يسمعك و بعقل راسي
و صدر مليان خير
و قلب يحب
مش مليان فتوة!!
حد لو تسأل يجاوب
يمشي جنبك و إنت راكب
حد يتحمل رزايلك
و إنت غاضب
ينسى همّه أو متاعبه
لمّا تحصلك متاعب
حد يتألم لجرحك
و السعادة عنده فرحك
و إن خاصمته ف يوم
يصالحك
و إن غضبت عليه يسامح
حد شبهك في الملامح
و اللي جوة عروقه دمك
حد مش بس ابن والدك
وللا أمه نفس أمك
لأ دا يستر في الفضايح
و تلاقيه يوم النوايح
كتفه واقف جنب كتفك
الأخوة
يعني حد كريم
و صادق في النصايح
مش يسيبك في الشدايد
و إنت جيّ تشوفه رايح!!
حد ينسى إنك عاتبته
و إما عازك يوم خذلته
وهو جاي يشكى همومه
حد يديلك هدومه
و لو جميع الناس تلومه
عمره ما يكشر جبينه
لو قلقته ف عز نومه
حد شايفك نني بينور عيونه
عمره ما يفكر يخونك
حتى لو تقدر تخونه
هي دي بجـد الأخوة
نـص أخلاق النـبــــــوة
الشاعر : عمرو عماره
مع تحيات جريدة أخبار نجوم الأدب و الشعر
رئيس مجلس الإدارة ورئيس التحرير الشاعر / خالد بدوي