خمسين سبب تخليني اشتغل في
مشروع العلم قوة !!
******************************
1- عشان اول اية نزلت على نبينا صلى الله عليه وسلم كانت بتقول
(( إقرأ )) .
2- عشان الحديث ده ((إن الله عباداً اختصهم لقضاء حوائج الناس , حببهم للخير وحبب الخير إليهم , أولئك الناجون من عذاب يوم القيامة ))
3- وده (( ان الله وملائكته واهل السموات والارض حتى النملة فى جحرها وحتى الحوت فى البحر يصلون على معلم الناس الخير ))
4- وده كمان (( من لم يهمتم بامر المسلمين فليس منهم كما قال رسول الله صلى الله عليه وسلم ))
5- عشان بحب بلدي اوي وميهنش عليا اشوف فيها 17 مليون أمي .
6- مدح سيدنا عيسى عليه السلام العلم وتعلمه فقال " من تعلم وعمل بما تعلم وعلم غيره دعى عظيما فى ملكوت السماوات " اى ان الملائكه اولياء الله يدعونه عظيما "
7- عشان خيركم من تعلم القرآن وعلمه ... عشان كل ام او اب يعلم ابنه من القرآن بعد مابقى يعرف يقرأ فيه
8- احياءا لعبادة الحض على فعل الخير لانها عبادة منسية
9- عشان مصر اول نور فالدنيا شق ظلام الليل
10- عشان مصر بتاريخها وحضارتها مينفعش تبقى رقم 148 في ترتيب دول العالم تعليميا .
11- عشان احنا مش اقل من جورجيا اللى فيها 99 % من الشعب متعلمين .
12- عشان احنا مش اقل من الهند اللي قدرت تمحي امية ملايين المواطنين في سنة واحدة .
13- عشان احنا داخلين على انتخابات مصيرية ولازم الناس كلها تنتخب الشخص المناسب بعد ما تقرى البرنامج بتاعه كويس .
14- عشان هشتغل مع صناع الحياة ودول ناس تاريخهم التطوعي رائع جدا ومشرف جدا جدا .
15- عشان المشروع مصروف عليه اكتر من 30 مليون جنيه من شركة فودافون يعني فيه جدية في الموضوع .
16- عشان د. عمرو خالد راعي للمشروع ومشارك فيه بقوة ومصر على نجاحه باذن الله وده راجل انا بثق فيه وبصدقه جدا وتاريخه الدعوي والتطوعي غني عن التعريف .
17- عشان بدات رموز علمية عملاقة تؤمن بالفكرة وتشارك فيها زي د. فاروق الباز .
18- عشان نفسي محدش يتضحك عليه ولا يمضي على ورقة من غير ما يعرف مكتوب فيها ايه ؟؟
19- عشان عايز احس ان حصل في بلدنا ثورة ومش هاحس بكدة الا لما الاقي تغييرات جذرية حصلت فينا احنا كشعب مش بس في النظام .
20- لان كل كلمة بيقراها امى احنا شاركنا فى تعليمة بناخد بيها حسنات الى يوم القيامة ان شاء الله
21- عشان مفيش طفل يموت عشان مامته مكنتش عارفه تقرا نشرة الدوا
22- عشان مفيش حد يفقد بيته بسبب بصمته على ورقة ميعرفش اللى فيها
23- عشان مينفعش تبقى ثورتنا انطلقت من الفيس بوك وغيرها من وسائل التكنولوجيا وعندنا 17 مليون مواطن مش بيعرفوا لا يقروا ولا يكتبوا .
24- عشان بحب العمل التطوعي اوي ومؤمن ان هو اساس نهضة بلدنا .
25- عشان بحب اساعد الناس واقدملهم خدمات ومفيش خدمة احسن من اني اساعدهم يعرفوا يقروا ويكتبوا .
26- عشان صعبان عليا تبقى اخر جايزة نوبل خدها حد مصري كانت من اكتر من 5 سنين وانا بحلم ان جايزة نوبل تكون كل سنة في مصر ان شاء الله .
27- عشان اعرف الناس ان اللي اخترع مثل (( بعد ما شاب ودوه الكتاب )) ده انسان فاشل ومش عارف الحاجة وندفن كلنا المثل د هده بلا رجعة ونخلي المثل الجديد يبقى : بعد ما شاب عرف اهمية الكتاب
28- لان زكاة العلم اللى اتعلمناه اننا نعلم ناس محتجاه
29- علشان نأخد ثواب المباردة في وضع الامة علي قضيب النهضة
30- عشان يبقى كل واحد في بلدنا فاهم ايه اللي ليه واه اللي عليه .
31- عشان كل الناس تعرف تقرى الجرايد وتفهم وتعرف اخبار بلدهم وتعرف امتى وازاي تطلب حقها .
32- عشان محدش يخلي حد يفكر بالنيابة عنه بداعي انه بيفهم احسن منه عشان بيعرف يقرى ويكتب ويبقى كل واحد بيفكر لنفسه وبيحدد مصيره بنفسه .
33- عشان يبقى كل اب وام مثل لابنائهم لان الامي والامية نادرا ما ينجبون اطفالا متعلمين .
34- عشان انا متأكد ان اساس النهضة هو العلم ومشروع العلم قوة ان شاء الله هيكون اول لبنة في بناء نهضة بلدنا
35- عشان زى ماشجعنا بقية الدول العربية تعمل ثورة ع الظلم نشجعهم يعملوا ثورة للعلم لانها دعوة للاصلاح ف بلدنا واعمار الارض
36- عشان حسيت بالعار لما تابعت اخر مؤتمر لمحو الامية في الهند وصدمت لما عرفت ان مصر واحدة من الدول التسعة اللي فيها اكبر عدد من الاميين في العالم
37- علشان دا حق الاميين علينا اننا نأخد بايدهم للنور
38- عشان مايكونش فى اطفال متسربين من التعليم
39- عشان اقضي ع البطالة
40- عشان ابن بلدى لية حق عليا
41- عشان بحلم ييجى علينا يوم ولادنا يسمعوا كلمة محو الامية نقولهم كان يا ماكان فى قديم الزمااان
42- عشان حاسس ان بلدنا محتاجة اوي مشروع قومي يلم حواليه كل الناس ويحلمه مع بعض بتحقيقه .
43- عشان يبقى كل مصري ومصرية في كل المكان في العالم فخور ببلده وبشبابها اللي قدر يمحي الامية فيها ويحقق اللي فشل فيه الحكومة لاكتر من 30 سنة .
44- عشان اللى فقد الامل فى الحياة بجهله نرجعله الامل من تانى بعلمه
45- عشان منخليش اي رئيس قادم يضحك علينا تاني ويستغل جهلنا وعدم فهمنا للامور .
46- لاني مؤمن جدا ان لو قدرنا نمحي امية 17 مليون امي او نسبة كبيرة منهم هنقدر نعلي من المستوى التعليمي في مدارسنا وجامعتنا عشان يتناسب مع القوة التعليمية لابناء البلد ده
47- عمل عظيم نفخر بيه لما ان شاء الله نقابل رسولنا الكريم يوم القيامة
48- عشان بمجرد اني قريت اعلان المشروع فانا مسئول عن كل امي وامية في بلدي محتاج مساعدتي وهتحاسب يوم القيامة لو مساعدتهوش
49- عشان بكرة يبقى احلى
50- عشان انا مصـــــــــــــــــــــري