وحياة غلاوتك عندي ياحبيبي ماتسبنيش لوحدي وتسافر
ولا تبعد عني ياحبيبي ولآ تقسي عليآ لو لحبي لسه فاكر
ليه ياحب غالي علي البعد ناوي وعلي الهجر قادر وعايز تهاجر
لو لسه قلبك بيدق للحب دقاته زي زمان ولسه ليآ عندك خاطر
راجع ذكريات الليالي الحلوه وذكريات غرامك وانت معايا حاضر
وافتكر ليالي همس حبنا وكل كلمه كنت بتقولهالي وبقولهالك
وكل فرحه فرحتهالي في ليالي غرامي وحلاوة غرامك
وإفتكرلي كله دمعه سالت من عيني علي خدي أيام زعلك وأيام خصامك
وكل لحظه اشتكي فيها قلبي من عذاب ليالي هجرك وغيابك
وافتكر ياحبيبي ايامنا وليالينا اللي عشناها سوآ
وازاي جمعنا الحب من غير ميعاد ومعاه الوفا والهوآ
هتلاقي قلبك لسه فاكر كل همسه حب گانت بينا ومش ناسي كلامك
يبقي ليه تسافر وتخلي بعدك يكون سبب عذابي وعذابك
ولو كان قرار السفر غصب عنك ولآزم تسافر يبقي لازم ياحبيبي تاخدني معاك
علشان مقدرشي اتحمل بعدك عني لحظه وأتحرم من هواك
ازاي عايز تسافر وحدك من غير ماتفكر فيآ 
ولا تفكر في العذاب اللي هيجري ليآ
ولاَّ مش همك ضنا قلبي ولا وجدي ومش فارقه معاك دموع عنيآ
واللي ح يسببه جرح بعدك وغيابك ياحبيبي بيآ
إزاي بس قولي فكرت ليه كده وازاي هان عليك تقسي عليآ وتاخد قرارك
عايز تبعد وتحطم قلبي وكل احلامي وأحلامك
مين ياحبيبي قساك عليآ قوللي ومين إللي غيرلك كل أفكارك
ونساك عشرة سنيني وحبي وشوقي ولهفتي وحنيني
وليه عايز تخلق في قلبي حزني وتعيشني أنا وأنيني
دانت عمرك مافكرت يوم تتغرب وتبعد عن حضني ولا خطر يوم علي بالك
ماانت عارف مقدرش أعيش بعيده عنك ويعذبني خيالك
وعارف قد ايه حبك وهواك ملكني ودايماً ياحبيبي محتالك
لو هتسافر ياحبيبي وتسيبني اوعي يوم من الأيام تيجي وتلومني
علشان اختيارك وقرارك كتير هيعذبني وغصب عني هغيرني
وقلبي ياحبيبي ماراح يتحمل عذاب بعدك ولا ظلمك فيآ
وهيغيرني من جوايآ هجرك وعذابه وضناه وهيعلمه القسيه
وهتلاقي نفسك ساعتها خسرتني وخسرت قلبي وحبي وكل مافيه من حنيه