مش معقول أنساكى
دا انتى جوايا
وما اعرفش نفسى
إلا وانا معاكى
وان ضاع منى عمرى
أدور عليه
القاه جواكى
وازاى تقولى
على حبنا أوهام
لأ..كتير
صعب قوى
كده ..حرام
والطفولة مش بالخجل
الطفولة حلم وأمل
فاكره ؟!
أول ما كتبنا حرفين
من إسمنا
أيوه..إنتى ..وانا
كنا راسمين فيهم حلمنا
وقعدنا سوا
نحسب آمالنا وعمرنا
واحنا بنشوف بعضنا
ايوه ياحياتى أنا
وطيفى وطيفك
بيضمنا
ملعون اللى يفرق بينا
ويبعدنا عن حبنا
الحب الحقيقى
عمره ما يذل
الحب الصادق
هوه اللى علينا يهل
ويفتح أبوابه وشبابيكه
ويسمح للهوى 
يحضنا سوا
ويطل
ويملالنا كاس المنى
واحنا هنا
مالناش غير بعضنا
ونفتح كتاب عمرنا
اقريلى..؟!
مكسوفة؟!
بلاش ..اقرالك أنا
ماتصدقيش
غير حبك مفيش
أنا من غيرك
ما أقدرش أعيش