طلبوا عنوان عبد الصمد 
علشان يخاطبوه بالبريد
قلنالهم الراجل اعتمد
إمبارح عزل سكن جديد
مكان صغير كدا على أده
وجيرانو ناس طيبين
لا حد يرفع دعوى ضده
ولا ينكسر عليه شهرين
مكان كلو اتحاد ملاك
فيه القاعدين ميعزلوش
وكل واحد يسألو ملاك
عن عملو واللى معملهوش
وكل واحد فيه فحالو
ملهوش دعوه بحد غيرو
لاحد راحلو ولا حد جالو
ولا حد يعرف خط سيرو
عبد الصمد كان راجل طيب 
لا يحب اللف ولا الدوران
وكان قاعد معانا قريب
يحكيلنا عن حكايات زمان
عبد الصمد عنوانو هناك 
مستنى الباقى هيروحولو
بيقولك خلص اللى وراك 
وجهز رد عشان تقولو
بيقول كمان الأسئله صعبه 
ومش عاملين فيها اختيارات 
وان الحكايه مهياش لعبه
وطول الوقت فيه حسابات