والسر بقى علني
انا كنت هناك ف داره
وبندهه...... عمي
لكن ماصنش العضم
ف التربة ولا صاني
عيشتي على قد حالى 
وعلامى كان عامي
يادوب بفك الخط
واخدم ف بيت ....
عمي
ومراته كات بتغير 
شيفانى مش سني
شيفانى غريب وهوة
لا خالي ولا عمي
بتقولي عودك اتلف
شعرك طويل عني
لأ داري رجليكى 
كعبك بقى محني
انا قلت ده حب منها
اتاريها غيرة مني
غيرانة طب على ايه؟
على موت ابويا وامي؟
انا شفت قسوة كتيير
جوزها ومرات عمي
ماهي برضه معذورة
جوزها ده عينه مني
يرمي الورق ع الارض
يقولي خدي لمي
فى الرايحه والجاية
يقولي طب طلي
ده اللى يشوفك يتووه
من قبل ما يسمي
جوزها وعينه زايغة
لا صانها ولا صاني
كتمت جوايا 
نزف كتير دمي
مرضتش اشكي لحد
وازوده همي
لحد ماجيت ف يوم
وكبرت عن سني
هربت سبت البيت
وقولت اشوف فني
فني يصلحنى 
من بعد ما زمانى 
فشفشني وكسرنى
لقيت الفنى جانى 
يحب ويغني
ويقولي انتى منايا
لحد ما فتني
قولت يستتني
قالي وايه يعنى
منتي اصلاحبيبتى 
ومنايا وهنايا
وياريته ماهو جانى 
وف النهاية خااني
جاب ضرتى لبيتى
جاب ضرة تكسرني 
وجانى بعده مذيع
عملى برنامج
وطلب افضفض فيه
اشكيله فيه... همي
شكيت وياريته ماكان
والكشك بقى دكااان
والكون سمع عني
ياريتنى ماتكلمت
ولابوحت ولا سلمت 
ده السر بقى علني
كلمة... قالتها امي
المنحوس منحوس
ولو يابنتى كمان
علقوا ف ديله فانوس
يرقصله ويغني
تعبت يازماااانى 
زودت ليه همي
والسر بعد ماكان
سري 
ده بقى علني