متلموش علي حد عاش
أسوء تجارب في الحياة 
جرحه كبير همه كتير
ومع كل دا مقلش اه
مداري جرحه في هدمته
محجر في عينه دمعته
شايل في قلبه بلوته
غرقان ومش لاقي النجاه
فامتلموش لو جه في يوم
واتغيرت حبة حاجات 
متعودين تشفوها فيه
ساعات بيتعب م السكات
ووقتها بصوا في عنيه
هتلاقوا دمعه ع الجفون
واقف ومستني الاهات
نفسه يقول الاه 
وينزل دمع عينه 
نفسه يصرخ يشتكي
تعباه سنينه
نفسه يعيش من غير وجع
عيني عليك يادي الجدع
شايل كتير 
ولا يوم نطقت
اه يا دنيا يا ام البدع
متلموش لو يوم نديتو
وبص ليكوا وقام سرح
ومتسألوش سرحان في ايه
مهو لو هيعرف كان شرح
سيبوه سرحان في حاله 
وفي حياته 
سيبوه شويه كفايه انه
ما فرح
فامتلموش
هتلاقوا وشه مبتسم 
قدام عيونكم 
وعمره مره بظلمكم 
كان جه ولامكم 
مرسومه ضحكه ع الوشوش
وجوه قلبة جراح بتنزف
من كلامكم
فامتلموش
ومتزعلوش لو يوم صرخ
مهو غصب عنه 
كل الحكاية انه جريح
من صغر سنه 
مادقش يوم طعم الفرح
ولا حتي قلبة يوم انشرح
ولا في دوا يطيب جراحه
ولا في طبيب لحالته شرح
فامتلموش