بصراحه ياولد عمى 
وعلى رؤوس الأشهاد
إوعدنى متزعلش منى 
وتخلى مبينا وداد
الحقيقه الحلوه البريئه
نصنا بيحب الفساد 
والنص حاسس بضيقه
بس كمان عندو استعداد
أمانه عليك بس متتاخد 
مهو نص بيدى ونص بياخد
ولو حقيقى فيه تطهير
ميتبقاش منينا كتير
وعاوزنى اقولك إيه كمان 
الرشوه علنى وفالميدان 
دى عاده فينا ومستحكمه
الرشوه حتى فى المحكمه
وللا روح كدا قسم الشرطه 
لو مدفعتش تبقى فورطه
منغير غرور روح المرور 
ووعد منى دمك هيفور
وللا المدرسه وللا المستشفى 
أخاف ليقولوا دا بيتشفى
نظام خدنا عليه وخلاص 
ماشيه عليه كل الناس
ولا عاد الراشى ولا المرتشى 
حد خلاص منهم يختشى
مرتشى وبيشكى من الرشوه
بصراحه حسسنى بنشوه
ياعم دا كل شيئ بالمال 
بيمشى فجميع الأحوال
وكمان بقينا صعب نعيش 
لو مفيش اللى ميرتشيش
لو صادفك واحد مياخدشى 
يبقى الأخرانى .. ومعادشى
دا غير وغير وغير وغير
لو هنقول ..هنقول كتير 
أنا بس مش عاوز اطول
ونرجع نعيدو من الأول