ورقة بيضا 
قلبي أما إتولد
وبداية بشهادة
ميلادي
شَقِّيت طريق
كُله رِضا
ما قدرش على
صبري وعنادى
والضحكة مالية
دنيتي
ناصراني على
لِيلِي وسُهادي
ومشيت طريقي
وسكتي
مش باصه ل اليوم
اللي غادي
وف يوم لقيته
ف سكتي
ولا كان على بالي
قلت أما أحرر دنيتي
والعمر يحلالي
وأفك أسري وغربتي
ويكون لي موالي
وسِبت قلبي للبراح
يحب يعشق يتسند
أتاريني عشت وهم
مات من قبل مايتولد
يادنيا ليه بتعذبي
قلب إتولد للفرح نادىَ
ويوم مافكر تسعديه
كبلتي روحه والأيادي
والفرح عمره مايكتمل
يسبقه النوح والسهاد
على كل حال
مش ها انْكِسر
واهُو يوم ب جَرح
ويوم ب فَرح
وقَدَرنَا ما ترُده الأيادي
وفي النهاية 
ف ورقة بيضا
وفيها إسمي
سموها 
ب شهادة وفاتي