عينى على بنية سايرة من بدرى تخطى فى الطين
شايلة زلعتها فوق ضلعتها والبر بيقطع فيها بسكين
لا فى يوم اشتكت ولاجات بكت ولاسمعنلها انين
الشهر صايمه والدهر قايمه والرزق هزيل وضنين
السواعد جامدة والرب حامده وللعيال ايد وعنين
وعجبى على بنت فى سنها فوق وتحتها سطربطاطين
الضهر زي الصبح عندها وماقالت فى يوم يامعين
غرقانة فى النوم والرزق بالكوم لاحسد ولاتلسين
من الهم شاكيه ومن الغم باكية والنفسية طين
والعيال شاردة والمصايب وارده وساكنها شياطين
قيراط رضا ولافدان فهلوة ورضا ربنا كنز دفين
والكيال فى العلالى صاحى بيوالى لابيظلم ولايهين
والاجر فى الاخرة من غير مفاخرة وكله بالموازين
يابنت حوا اعمليلك مروة وشدى وسطك بمتين